काठमाडौं, १० फागुन । अर्थमन्त्री डा. युवराज खतिवडाले लगानी बोर्डमार्फत नेपालको विकासमा सहभागी हुन वेलायतमा रहेको नेपाली समुदायलाई आग्रह गरेका छन् ।
ब्रिटिश एक्सपर्टिज इन्टरनेशनल (बीईआई) ले आयोजना गरेकोे नेपालमा लगानीको अवसर विषयक कार्यक्रममा दुई दर्जनभन्दा बढी बेलायती कम्पनीका व्यवसायी तथा लगानीकर्ताहरुसँग उनले मुलुकको लगानीको अवसर, वातावरण र सम्भावनाका बारेमा स्पष्ट पारेको अर्थमन्त्रीको सचिवालयले बताएको छ ।
मन्त्री खतिवडाले नेपालमा लगानीको लागि उपयुक्त गन्तव्य भएको भन्दै लगानी गर्दाका सापेक्षित लाभबारे बेलायतस्थित नेपाली लगानीकर्तालाई जानकारी गराए ।
नेपालमा लगानीका लागि सरकारले लगानी बोर्डलाई विशिष्टिकृत संस्थाको रुपमा विकास गरेकाले त्यसै मार्फत ठूला व्यवसायी तथा लगानीकर्तालाई सोही बोर्ड मार्फत एकद्वार सेवा उपलब्ध गराउने पनि उनले स्पष्ट पारे ।
‘सम्बन्धित कानूनको परिर्माजन र तर्जुमा नीतिगत तथा प्रशासनिक सुधार गरी लगानी प्रवद्र्धन गर्ने मैत्रीपूर्ण वातावरणको निर्माण गरिएको छ । यो नेपालमा लगानीका लागि उपयुक्त समय हो,’ उनले भने ।
लगानी सम्मेलन बाहेक वैदेशिक लगानी प्रर्बद्धनका नियमित क्रियाकलाप के–के छन् भन्ने जिज्ञासामा अर्थमन्त्री खतिवडाले नियमित रुपमा विदेशस्थित नेपाली नियोगलाई आर्थिक कुटनीतिको लागि परिचालन गर्ने, सूचना प्रविधिको अधिक उपयोग गर्दै लगानी बोर्ड, उद्योग मन्त्रालय आदिका वेभसाइत मार्फत लगानी प्रवर्द्धनात्मक क्रियाकलाप संचालन गर्नेलगायत सरकारका नीति कार्यक्रम तथा वार्षिक बजेट मार्फत यसको सम्बोधन गर्ने विषयमा संघमा आवद्ध संस्थालाई जानकारी गराएका थिए ।
कार्यक्रममा नेपालमा गरिने लगानीको सुरक्षा र सहज वातावरण दिन सरकार तयार रहेको समेत उनले विश्व समुदायलाई विश्वास दिलाउने प्रयास गरे । चैत १५ र १६ गते नेपालमा ठूला लगानी कर्ता आकर्षित गर्ने उद्देश्यले आयोजना गर्न लागिएको लगानी सम्मेलनको पूर्व तयारीस्वरुप खतिवडा बेलायत गएका हुन् ।
