काठमाडौं । प्रधानमन्त्री केपी शर्मा ओलीको दल नेकपा (एमाले) ले आज काठमाडौंको सडकमा प्रदर्शन गर्दैछ । दरबारमार्गमा प्रदर्शनपछि सभा राखिएको छ । सोहीकारण बिहानैबाट सवारी डाइभर्सन गरिएको ट्राफिक प्रहरीले जनाएको छ ।
दरबारमार्गबाट आउने सवारीलाई केशरमहल, महेन्द्र सालिक र जयनेपाल चोकबाट डाइभर्सन गरिएको छ । बिहान सम्म अन्य स्थानको सवारी आवागमन भने सामान्य रहेको प्रहरीले जनाएको छ । एमालेले ११ बजेबाट सडकमा प्रदर्शन थाल्ने भनेको छ ।
त्यसपछि सडक अस्तव्यस्त हुनेछ । सभालाई पार्टी अध्यक्षसमेत रहेका प्रधानमन्त्री ओलीले सम्बोधन गर्ने कार्यक्रम छ । भद्रकालीबाट जुलुस न्युरोड गेट, वीर हस्पिटल, रत्नपार्क, त्रिचन्द्र क्याम्पसको अगाडिबाट दरबारमार्गमा पुगेर कोणसभामा परिणत हुने बताइएको छ ।
बिहान साढे ११ बजे जुलुस सुरू गरेर साढे १२ बजे दरबारमार्गमा कार्यक्रम हुने छ । एमालेले अराजकता र निराशालाई चिर्न जागरणसभा गर्न लागिएको दावि गर्दै आएको छ ।
