काठमाडौं, ४ चैत । सााहसिक पर्यटकीय गतिविधि मन पराउनेहरुका लागि राजधानी नजिकै जिपलाईन शुरु भएको छ । फलामको लठ्ठा (डोरी)मा ‘हार्नेस (जीपलाइन गियर) लगाई झुण्डिएर गरिने शाहसिक खेललाई जिपलाईन भनिन्छ ।
काभ्रेको धुलिखेल नगरपालिकास्थित थाक्लेबाट पाँचखाल नगरपालिकाको खावा जोड्ने गरी जिपलाईन सेवा शुरु भएको हो । सिन्धुपाल्चोकका ३५ वर्षीय केदार थापा र काठमाडौंका २७ वर्षिय भुपेश श्रेष्ठको लगानीमा जिपलाईन शुरु भएको हो ।
परीक्षण यात्रा शुरु गरिसकेको जिपलाईनले दैनिक ६० जनासम्मले सेवा दिन सक्ने बताइएको छ । यो नयाँ साहसिक पर्यटकीय व्यवसायमा अहिलेसम्म करीव ४ करोड रुपैयाँ लगानी भइसकेको छ । काठमाडौं, कोटेश्वरबाट अरनिको राजमार्गमा ३३ किलोमिटर दूरी पार गरिसकेपछि माथिल्लो स्टेशन राखिएको स्थानमा पुगिन्छ । जहाँबाट जिपलाईनको यात्रा प्रारम्भ हुन्छ । करीब ८० सेकेण्ड हावाको वेगलाई चूनौति दिँदै खावा स्टेशनसम्म पुग्न सकिन्छ ।
यो जिपलाईन ११ सय मिटर लामो छ । धुलिखेलमा समुन्द्री सतहबाट १३ सय मिटर उचाईमा टप स्टेशन राखिएको छ । बटम स्टेशनसम्म पुग्दा दुरी १ सय मिटर कम हुन्छ । कम तौल तथा विपरित दिशाबाट बहने हावाका कारण कोही सिधै बटम स्टेशन पुगेनन् भने बटम स्टेशनमा रहेका प्राविधिकले डोरीको सहायतामा खेलाडीलाई अवतरण गराउँछन् ।
जिपलाईन यूरोपेली तथा अमेरिकी सुरक्षा मापदण्ड पुरा गरिएको तथा अष्ट्रिया र भारतीय प्रविधिमा निर्माण गरिएको कम्पनीले जानकारी दिएको छ । धुलिखेल जिपलाईनले सुपरम्यान, कपलशैली र क्लासिक गरी तीन शैलीमा जिपलाईन गर्न सकिने सुविधा दिएको छ ।
जिपलाईन १३ वर्षभन्दा माथिको उमेरका व्यक्तिले मात्र गर्न पाउनेछन् । बालबालिकाका लागि भने यहाँ छुट्टै पार्क निर्माण भइरहेको छ ।
मूल्य सूची
राष्ट्रियता क्लासिक सुपरम्यान कपल
नेपाली रु. २५०० रु. ३५०० रु. ४५००
सार्क ३० डलर ४० डलर ५० डलर
अन्य मुलुक ३५ डलर ४५ डलर ६० डलर
