काठमाडौं, २६ बैशाख । बैंक तथा वित्तीय निकायहरुले शुक्रबारदेखि आफ्ना सबै खाले सेवा दिन सुरु गरेका छन ।
सरकारले उद्योग, बैंकिङ तथा वित्तीय निकाय लगायत बिभिन्न क्षेत्रलाई सेवा सुचारु गर्न दिने गरेपछि बैंकहरुले आफ्नो सम्पूर्ण सेवा प्रवाह दिन थालेका हुन् ।
बैंकर्स संघका अनुसार सरकारको निर्देशन अनुसार एक तिहाई कर्मचारी खटाएर सेवा सुचारु गरिएको हो ।
सरकारले बुधबार बैंक तथा वित्तीय संस्था, बीमा धितोपत्र, सहकारी मार्फत सेवाप्रवाह गर्नका लागि आवश्यक कर्मचारीहरु मध्ये एक तिहाई कर्मचारीद्वारा सेवा सञ्चालन गर्न दिने निर्णय गरेको थियो ।
राष्ट्र बैंकले भने सेवा सुचारु गर्दा विशेष सावधानी अपनाउन बैंकहरुलाई निर्देशन दिएको छ । सामाजिक दुरी कायम राखेर सेवा प्रदान गर्ने र सुरक्षाका प्रावधानहरु अपनाउन कर्मचारी तथा ग्राहक लगायत सबै पक्षलाई कडाइ गर्न केन्द्रीय बैंकले निर्देशन दिएको छ ।
