काठमाडौं, १ असोज । गैरआवासीय नेपाली संघ (एनआरएनए)ले आयोजना गरेको दोस्रो विश्व ज्ञान सम्मेलन यही असोज २३ गते शुरु हुने भएको छ ।
सम्मेलनको उद्घाटन प्रधानमन्त्री केपी शर्माले गर्ने एनआरएनले एक विज्ञप्तिमार्फत जानकारी दिएको छ ।
एनआरएनए अध्यक्ष कुमार पन्तका अनुसार आगामी अक्टोवर ९ देखि ११ (असोज २३ देखि २५) तीन दिनसम्म चल्ने भर्चुअल सम्मेलनको प्रधानमन्त्री ओलीले उद्घाटन गर्ने भएका हुन् ।
सम्मेलनमा संयुक्त राष्ट्र संघअन्तर्गतको विश्व खाद्य संगठन, अन्तरराष्ट्रिय श्रम संगठन, इसिमोड, एसियाली विकास बैक, राष्ट्रिय योजना आयोग र विश्व बैंकमा कार्यरत विज्ञहरुले कार्यपत्र प्रस्तुत गर्ने छन् ।
नेपाल सरकारका प्रवक्ता तथा परराष्ट्रमन्त्री प्रदीपकुमार ज्ञवाली विषेश अतिथिको रुपमा उपस्थित हुने सो सम्मेलनमा गैरआवासीय नेपाली विज्ञबाहेक साइप्रस, अमेरिका, बेलायत, चीन, जापान, फिनल्यान्ड, अष्ट्रेलिया, नर्वे, नेदरल्यान्ड, क्यानाडा, भारत, सिंगापुर, श्रीलंका, फ्रान्स, जर्मनी, दक्षिण कोरियाका वैज्ञानिकहरु सहभागी हुने छन् ।
विदेशमा रहेका र विदेशबाट फर्किएका नेपालीको ज्ञान, सीप र बौद्धिकतालाई नेपालको विकास एवं समृद्धिका लागि प्रयोगमा ल्याउन दुई वर्षअघि विश्व ज्ञान सम्मेलन आयोजना गर्न सुरु गरिएको एनआरएनएले बताएको छ ।
संयुक्त राष्ट्रसंघको दिगो विकास लक्ष्य र नेपाल सरकारको १५ औँ पञ्चवर्षीय योजना, कोरोना महामारीपछि नेपालको अर्थतन्त्र, कोरोनाले नेपालमा पारेको प्रभाव र कोरोनापश्चात विश्वभर चालिएका कदम र नेपालले अवलम्बन गर्नुपर्ने रणनीतिका केन्द्रित हुने सम्मेलन आयोजक समितिका संयोजक डा. हेमराज शर्माले जानकारी दिए ।
एनआरएन र नेपाल सरकारको सहकार्यमा हुन लागेको यो सम्मेलनमा चार प्लेनरी सेसन र १५ सिम्पोसियम सेसनको आयोजना हुने सम्मेलन आयोजक समितिका सहसंयोजक डा. हरि दाहालले जानकारी दिए ।
सम्बन्धितः
कोरोनाले विदेशमा थप ४३ नेपालीको ज्यान लियो, साउदीमा मात्रै ५२ जनाको मृत्यु
म्यारिज एनिभर्सरी मनाउन जम्मा भएका ३५ नेपाली कोरोनाभाइरस संक्रमित, एकको अवस्था गम्भीर
दोस्रो विश्व ज्ञान सम्मेलन आगामी अक्टोबरमा, कोरोनापछिको आर्थिक अवस्थामा केन्द्रित हुने
