काठमाडौं, २८ कात्तिक । एनआइसी एशिया बैंकले चालू आर्थिक वर्षको पहिलो त्रैमासमा अधिकांश वित्तीय सूचकहरु सुधार गरेको रिपोर्ट सार्वजनिक गरेको छ ।
बैंकले शुक्रबार प्रकाशन गरेको चालू आवको पहिलो त्रैमासको वित्तीय विवरण अनुसार १ अर्ब २ करोड १० लाख रुपैयाँ खुद मुनाफा आर्जन गरेको छ ।
यो गत आवको सोही अवधिको तुलनामा १ करोड १४ लाख रुपैयाँ बढी हो। बैंकले गत आवको सोही अवधिसम्ममा १ अर्ब ९६ लाख रुपैयाँ खुद नाफा कमाएको थियो।
अहिलेसम्म वित्तीय विवरण सार्वजनिक गर्ने १२ वटा बैंकहरुमा १ अर्ब बढी नाफा कमाउनेमा एनआइसी एशिया तेस्रो बैंक बनेको छ । पहिलो त्रैमासमा प्राइम र ग्लोबल आइएमईले पनि १ अर्ब बढी नाफा कमाएका छन् ।
९ अर्ब ७१ करोड ७६ लाख रुपैयाँ चुक्ता पूँजी रहेको बैंकको जगेडा कोषमा ६ अर्ब ६९ करोड ५१ लाख रुपैयाँ र रिटेन्ड अर्निङ्गमा २ अर्ब २ करोड ४७ लाख रुपैयाँ सञ्चित छ। समीक्षा अवधिसम्म बैंकको वितरण योग्य मुनाफा ४ करोड ६६ लाख रुपैयाँ रहेको छ।
समीक्षा अवधिमा बैंकको खुद ब्याज आम्दानी १४ करोड रुपैयाँले बढेर १ अर्ब ९८ करोड रुपैयाँ पुगेको छ भने सञ्चालन मुनाफा २ करोड ८४ लाख रुपैयाँले बढेर १ अर्ब ४५ करोड ८० लाख रुपैयाँ पुगेको छ।
असोज मसान्तसम्म बैंकले २ खर्ब ३१ अर्ब ३३ करोड रुपैयाँ निक्षेप संकलन गरी १ खर्ब ८९ अर्ब ८१ करोड रुपैयाँ कर्जा प्रवाह गरेको छ ।
खुद नाफासँगै बैंकको प्रतिसेयर आम्दानी १.३६ रुपैयाँले बढेर ४२.१४ पैसा रुपैयाँ छ । समीषा अवधिसम्ममा बैंकको प्रतिसेयर नेटवर्थ १८९.७१ रुपैयाँ, मूल्य आम्दानी अनुपात १३.७२ गुणा, खराब कर्जा ०.४० प्रतिशत पुगेको छ बेसरेट ६.५० प्रतिशत र स्प्रेड दर ४.३९ प्रतिशत रहेको छ ।
