काठमाडौं । स्पेनिस फुटबल क्लब बार्सिलोना २५ वर्षयताकै खराब लयमा देखिएको छ । सिजनको राम्रो सुरुवात गर्न नसकेको बार्सिलोना शनिबार राति एथ्लेटिको मड्रिडसँग १-० गोल अन्तरले स्तब्ध भयो ।
डच प्रशिक्षक रोनाल्ड कोइम्यान नेतृत्त्वको जम्मा ८ खेल खेलेको बार्सिलोनाले ३ खेलमा जित, २ खेलमा बराबरी र ३ खेलमा पराजय भोगेको छ ।
२६ पटकको ला लिगा विजेता बार्सिलोनाले ८ लेलमा मात्र ११ अंक बनाएको छ । ऊ अंक तालिकाको दसौं स्थानमा छ ।
यससँगै बार्सिलोना २५ वर्षयताकै कमजोर देखिएको छ । १९९५–९६ मा बार्सिलोनाले खराब सुरुआत गरेको थियो । यसैगरी २००२–०३, २००३–०४ मा पनि बार्सिलोनाको सुरुआत ठीक थिएन ।
तथापि, त्यतिबेला बार्सिलोनाले सुरुआती आठ खेलमध्ये तीन खेलमा जित, तीन खेलमा बराबरी र २ खेलमा हार ब्यहोरेको थियो । कोइम्यानले नेतृत्त्व गर्दा पराजय पनि एक थपिएको छ ।
यसअघि खराब प्रर्दशनमा २०००–०१ को सिजनमा बार्सिलोनाले सुरुआती आठमध्ये तीन खेलमा हारेको थियो । तर, ४ खेलमा जित र एक खेलमा बराबरी गर्दै बार्सिलोनाले १३ अंक बनाएको थियो ।
