लेखनाथ, ८ जेठ (रासस) । कास्कीको बेगनास र रुपा ताललगायतका तालमा पर्यटन प्रवद्र्धनमा सहयोग पुग्ने गरी लेखनाथ होटल तथा रेष्टुराँ एशोसिएशनले यही जेठ १३ देखि २० गतेसम्म ‘फिस फेस्टिवल’को आयोजना गर्ने भएको छ ।
विगतमा तीन दिने माछा महोत्सव गर्दै आएकामा यस वर्ष महोत्सवको अवधि बढाएर आठ दिनको बनाइएको हुँदा यस वर्षको महोत्सव पहिलेका भन्दा प्रभावकारी हुने आयोजकले जनाएको छ ।
यस क्षेत्रमा रहेका सात वटा तालको प्रचारप्रसारमा सहयोग पुग्ने र ताल क्षेत्र वरपर आन्तरिक तथा बाह्य पर्यटन प्रवद्र्धनमा टेवा पुर्याउने उद्देश्यले पाँचौ संस्करणको माछा महोत्सव गर्न लागिएको आज आयोजित पत्रकार सम्मेलनमा एशोसिएशनका निवर्तमान अध्यक्ष दामोदरभक्त थापाले जानकारी दिए ।
स्थानीय जातका माछाको स्वाद चाख्नदेखि माछा उत्पादन प्रविधिका बारेमा जानकारी दिन र लिन महोत्सव सहयोगी हुने साथै कृषि व्यापार मेलासमेत समावेश गरिएकाले आगन्तुक पाहुनादेखि कृषकलाई पनि सहयोग मिल्ने आयोजकले जनाएको छ ।
महोत्सवलाई प्रभावकारी तरिकाले सञ्चालन गर्न विभिन्न उपसमिति गठन गरि तयारीलाई तिव्रताका साथ अगाडी वढाइएको छ ।
यस वर्षको माछा महोत्सवमा डुङ्गा दौड प्रतियोगिता, पौडी प्रतियोगिता र गण्डकी प्रदेश स्तरीय दोहोरी गीत प्रतियोगिताका साथै अन्य सांस्कृतिक कार्यक्रम गरिने एशोशिएशनका अध्यक्ष कृष्णप्रसाद तिवारीले जानकारी दिए ।
