काठमाडौं, १५ माघ । रुपन्देहीमा निर्माण व्यवसायीको ट्रक र डिष्ट्रिब्युटर (मेसिन) मा आगजनी गर्ने दोषीलाई कडा भन्दा कडा कार्वाही गर्न नेपाल निर्माण व्यवसायी महासंघले सरकारसँग माग गरेको छ ।
कोभिड–१९ को संक्रमण र सन्त्रासका बीचमा पनि भौतिक पूर्वाधार निर्माणको क्षेत्रमा सक्रिय निर्माण व्यवसायीहरुलाई हतोत्साहित गर्ने गरी अज्ञात समुहबाट भइरहेका हिंसात्मक घटनाहरू प्रति आफ्नो गम्भीर ध्यानाकर्षण भएको जनाउँदै महासंघले दोषमाथि कडा कारबाही गर्न र पीडित व्यवसायीलाई उचित क्षतिपूर्ति दिन सरकारसँग माग गरेको हो ।
बुधवार विहान रुपन्देही जिल्लाको सियारी गाउँपालिकामा सियारी पहुँच मार्ग अन्र्तगतको सडक खण्ड निर्माणमा प्रयोग भइरहेको निर्माण व्यसायीको एक ट्रक र डिष्ट्रिव्युटर मेसिनमा अज्ञात समुहले आगजनी गरेका थिए ।
सियारी गाँउपालिकाको भवन अगाडि पार्किङ गरी राखिएको एक ट्रक र एक डिष्ट्रिव्युटरमा आगजनी गर्दा कम्तीमा पनि ५० लाख भन्दा बढीको क्षति भएको महासंघले जनाइएको छ ।
निर्माण व्यवसायी संघ नवलपरासीका अध्यक्ष समेत रहेका लुम्बिनी प्रदेश निर्माण व्यवसायी महासंघका उपाध्यक्ष नविन ज्ञवालीको नविन कन्स्ट्रक्सनको लु.१.क ६९७६ नम्बरको ट्रक र डिष्ट्रिव्युटरमा आगजनी गरिएको हो ।
उक्त सवारी साधन र डिष्ट्रिव्युटर मेसिन पुष्पाञ्जली–समिर–जिम्बा जे.भी.द्वारा निर्माणाधिन सडकको काममा प्रयोग भइरहेका थिए । आगजनीका कारण दुवै उपकरणहरु पूर्ण रुपमा काम नलाग्ने गरी ध्वस्त भएको महासंघले जनाएको छ ।
निर्माण व्यवसायी र उनीहरुका उपकरणहरुको सुरक्षालाई लिएर महासंघले पटक पटक प्रधानमन्त्री सहित सरोकारवाला सबैको ध्यानाकर्षण गराइरहँदा समेत हिंसात्मक गतिविधिमा कुनै कमी नआउनु ठूलो चिन्ताको विषय भएको महासंघले जनाएको छ । यस्तै सिलसिला जारी रहेमा देशभरका निर्माण कार्य ठप्प पारी सशक्त आन्दोलनमा जान बाध्य हुने चेतावनी समेत महासंघले दिएको छ ।
साथै, तत्काल दोषीलाई पक्राउ गरी कडा भन्दा कडा सजाय दिन र सम्बन्धित् निर्माण कम्पनीहरुलाई क्षतिपूर्ति दिन महासंघले सरकारसँग माग गरेको छ ।
