काठमाडौं, ७ बैशाख । विदेश जान चाहने नेपालीहरुको प्रहरी प्रतिवेदन अब कन्सुलर सेवा विभागबाट प्रमाणित गर्नु नपर्ने भएको छ ।
मंगलबार एक विज्ञप्ति जारी गरी विभागले प्रहरी प्रतिवेदनलाई सम्बन्धित व्यक्ति आफैले रंगीन स्वरुपमा प्रिण्ट गरी काठमाडौंस्थित दूताबासहरुमा पेश गर्न सक्ने बताएको हो ।
नेपाल प्रहरीमार्फत् जारी हुने प्रतिवेदनलाई निवेदक स्वयंले अनलाइनबाटै रंगीन प्रिण्ट गरी काठमाडौंस्थित विदेशी नियागहरुमा यस विभागको प्रमाणीकरण विनै पेश गर्न सक्ने छन्, विभागले भनेको छ । यसबारेमा विभागले गत मे ३१ मै विदेशी नियोगहरुलाई जानकारी गराएको थियो ।
त्यसैगरी विदेशमा रहेका नेपालीले पनि अनलाइनकै प्रतिवेदन सम्बन्धित मुलुकका संस्थामा पेश गर्न सक्ने र ति संस्थाले अनलाइनमै त्यस्ता रिपोर्टको आधिकारिकता बुझ्न सक्ने बताइएको छ ।
कोरोनाभाइरस महामारीका कारण यस्तो व्यवस्था गरेको विभागको भनाइ छ । यसका साथै विभागले प्रमाणीकरणको समय बिहान ८ बजेदेखि बेलुका ५ बजेसम्म तोकेको छ ।
एक पटकमा २५ जनासम्मलाई मात्र सेवा दिइने पनि उसले बताएको छ ।
