काठमाडौं, ८ मंसिर । आर्थिक वर्ष २०७८/७९ को पहिलो चार महिनामा नेपालको व्यापार घाट बढेको छ ।
आर्थिक वर्षको सोही अवधिको तुलनामा घाटा ५६.८३ प्रतिशतले बढेर ५ खर्ब ६८ अर्ब १७ करोड रुपैयाँ पुगेको भन्सार विभागले बुधबार सार्वजनिक गरेको तथ्यांकले देखाएको छ ।
जुन गत वर्षको तुलनामा २ खर्ब, ५ अर्ब रुपैयाँले बढी हो । त्यस्तै कुल वैदेशिक व्यापार पनि गत बर्षको चार महिनासंग तुलना गरेर हेर्दा बढेको नै देखिन्छ ।
नेपालले भारतबाट चार महिनामा ३ खर्ब ८५ अर्ब ९५ करोडको वस्तु आयात गरेको छ भने नेपालबाट ६६ अर्ब ९४ करोड रुपैयाँको निर्यात भएको छ ।
यस अनुसार चार महिनाको अवधिमा भारतसँगको व्यापार घाटामात्र ३ खर्ब १९ अर्ब रुपैयाँको छ ।
चीनबाट भने नेपालले ९४ अर्ब ३० करोड रुपैयाँको वस्तु आयात गरेको छ भने ३१ करोड रुपैयाँको वस्तु निर्यात गरेको छ । अमेरिकाबाट ९ अर्ब ९१ करोड रुपैयाँको वस्तु आयात गरेकामा ६ अर्ब १० करोड रुपैयाँको वस्तु निर्यात गरेको छ ।
चार महिनाको अवधिमा नेपालको वैदेशिक व्यापार १३८ भन्दा बढी मुलुकसँग भएको छ । कात्तिक मसान्तसम्म नेपालले ८२ अर्ब १२ करोड ४२ लाख बराबरको निर्यात गरेको छ ।
गत वर्षको सोही अवधिमा नेपालले ४० अर्ब २० करोड रुपैयाँको मात्रै निर्यात गरेको थियो । जसमा गत वर्षको तुलनामा चालु आव १०४.२९ प्रतिशतले निर्यात बढेको छ ।
निर्यात बढ्नुमा भटमासको तेल, धागो, कपडा र पाम आयल तेलको ठूलो योगदान देखिन्छ । भारतले नेपालमाथि पाम आयलमा लगाउँदै आएको प्रतिबन्ध हटाएपछि पाम आयलको निर्यात बढ्न थालेको छ ।
विदेशबाट कच्चा पाम आयल र कच्चा भटमासको तेल ल्याएर त्यसलाई प्रशोधन गरिरहेको तथ्यांकले देखाउँछ । यस्तै, ४ महिनाको अवधिमा ६ खर्ब ५० अर्ब २९ करोड बराबरको विदेशी वस्तुको आयात भएको छ ।
गत वर्षको सोही अवधिमा नेपालले ४ खर्ब २ अर्ब ४९ करोड रुपैयाँको मात्रै आयात गरेको थियो । जसमा चालु आवमा गत वर्षको तुलनामा ६१.५७ प्रतिशतले आयात बढेको हो ।
