काठमाडौं, १२ मंसिर । शेयर बजारमा मौद्रिक नीति समीक्षाको प्रभाव परेको छ ।
जसको कारण साताको कारोबारको पहिलोदिन शेयर बजारमा पहिरो गएको छ ।
मौद्रिक नीति समीक्षा पछिको पहिलो कारोबार भएको दिन आज आइतबार नेपाल स्टक एक्सचेञ्ज (नेप्से) ८०.२९ अंकले घटेर २६१५. ४९ विन्दुमा झरेको छ ।
नेपाल स्टक एक्सचेन्जका अनुसार त्यसदिन २३४ कम्पनीको ५ अर्ब ८३ करोड ५१ लाख ३५ हजार ५४ रुपैयाँ बराबरको १ करोड, १९ लाख ३ हजार २०२ कित्ता शेयर किनबेच भएका छन् ।
आज कारोबारमा आएका १३ समूहको परिसूचक राताम्मे भएका छन् । धेरै गुमाउने होटल तथा पर्यटन र विकास बैंकका लगानीकर्ता रहेका छन् ।
बैंकिङ समूहको शेयर ३४ अङ्कले, विकास बैंकको दुई सय ६७, होटलको एक सय ४७, फाइनान्सको ६८, माइक्रोफाइनान्सको एक सय ३९ र जलविद्युत् समूहको शेयर एक सय ३२ ले घटेको छ ।
यस्तै उत्पादन समूहको शेयर एक सय १९२ अङ्कले, जीवन बीमा समूहको पाँचसय ८३ अङ्कले, निर्जीवन बीमा समूहको तीन सय ८५ घटेको छ । र अन्य समूहको शेयर एक सय ५९अङ्कले घटेको छ ।
दुई कम्पनीको शेयरमूल्यमा उच्च वृद्धि भएको छ । शेयरमूल्यमा उच्च वृद्धि हुने कम्पनीमा आइसीएफसी फाइनान्स र सामलिङ पावर कम्पनी रहेको छ ।
आज आइसीएफसी फाइनान्सको शेयरमूल्य ९.७८ प्रतिशतले बढेको छ । सामलिङ पावर कम्पनीको शेयरमूल्य ८.२१ प्रतिशतले बढेको छ ।
त्यस्तै, आज हिमालयन पावर पार्टनर र मानुषी लघुवित्त वित्तीय संस्थाको शेयरमूल्यमा गिरावट आएको छ ।
यी कम्पनीको शेयरमूल्य करिब ८ प्रतिशत भन्दा बढीले घटेको छ ।
यस्तै, कारोबारको आधारमा सबैभन्दा बढी कारोबार महालक्ष्मी विकास बैंकको भएको छ । यस बैंकको आज २९ करोड ८१ लाख भन्दा बढीको कारोबार भएको छ ।
