काठमाडौं, १८ माघ । भारत सरकारले नेपाललाई दिने वार्षिक अनुदान रकम घटाएको छ।
भारत सरकारले वित्त वर्ष २०२२/ २३ मा नेपाललाई अनुदान दिने गरी ७ अर्ब ५० करोड भारतीय रुपैयाँ (१२ अर्ब नेपाली रुपैयाँ) बजेट छुट्याएको हो ।
यो अघिल्लो वर्षको बजेटमा छुट्याइएको रकम भन्दा कम हो । गत वर्ष सन् २०२१–२२ को बजेट मार्फत भारतले नेपाललाई नौ अर्ब ९२ करोड भारु (१५ अर्ब ८७ करोड रुपैयाँ) सहयोग छुट्याएको थियो।
नेपाललाई छुट्याएको सहयोग रकम भारु ६ अर्ब ५० करोड (रु. १० अर्ब ४० करोड) रहेको संसोधित अनुमान छ ।
भारतले सबैभन्दा धेरै अनुदान भुटानलाई छुट्याएको छ । भुटानलाई २२ अर्ब ६६ करोड भारु दिने भएको छ ।
यो गत आर्थिक वर्षको भन्दा थोरै हो। गत वर्ष भुटानलाई ३० अर्ब भारु सहयोग छुट्याइएको थियो ।
दक्षिण एशियामा भारतले भुटानपछि सबैभन्दा धेरै सहयोग छुट्याउने मुलुक नेपाल हो। भारतले दक्षिणएशियामा बंगलादेश र माल्दिभ्सलाई दिने सहायता रकम भने बढाएको छ। गत वर्ष बंगलादेशलाई दुई अर्ब भारु छुट्याइएकोमा यो वर्ष त्यसलाई बढाएर तीन अर्ब भारु पुर्याइएको छ।
त्यसै गरी माल्दिभ्सलाई दिने सहयोग दुई अर्ब ५० करोड भारुबाट बढाएर तीन अर्ब ६० करोड भारु बनाइएको छ । तर, अफगानिस्तानलाई दिने सहयोग रकम घटाइएको छ।
