काठमाडौं, ९ वैशाख । उपकार लघुवित्त वित्तीय संस्था लिमिटेडको आइपीओ बाँडफाँड भएको छ ।
लघुवित्तले शुक्रवार विहान विक्री प्रबन्धक नेपाल एसबिआई मर्चेन्ट बैंकिङ्ग लिमिटेडको कार्यालय, हात्तिसारमा आइपीओ बाँडफाँड गरेको हो ।
लघुवित्तको आइपीओमा माग भन्दा बढी आवेदन परेकाले गोलाप्रथा विधिबाट १० कित्ताका दरले बाँडफाँड गरिएको छ । १० कित्ताका दरले आईपीओ बाँडफाँट गर्दा २२ हजार ११५ जनाले मात्रै पाएका छन् ।
भने ती मध्ये भाग्यमानी ६ जनाले थप १ कित्ता सेयर पाएक छन् । २३ लाख २६ हजार ९४१ जनाको हात रित्तो भएको छ ।
कम्पनीको आइपीओमा कुल २३ लाख ५१ हजार ४६२ जनाले आवेदन दिएका थिए । सोमध्ये २ हजार ४०६ आवेदन रद्द भएको क्यापिटलले जनाएको छ ।
लघुवित्तको आईपीओमा अन्तिम दिन मागभन्दा १२४.५४ गुणा बढी आवेदन परेको थियो । सिडिएस एण्ड क्लियरिङ्गका अनुसार लघुवित्तको आइपीओमा २४ लाख ३१ हजार १७० जना आवेदकले २ करोड ७५ लाख ६५ हजार २३० कित्ता शेयरका लागि २ अर्ब ७५ करोड ६५ लाख २३ हजार रुपैयाँ बराबरको आवेदन दिएका थिए ।
यसरी हेर्नुहोस् नतिजा
लगानीकर्ताले https://iporesult.cdsc.com.np मा गएर १६ अंकको डिम्याट नम्बर हालेपछि सजिलै हेर्न सक्नेछन् ।
यसैगरी, विक्री प्रबन्धक नेपाल एसबिआई मर्चेन्ट बैंकिङ्ग लिमिटेड र उपकार लघुवित्तको वेबसाइटबाट पनि नतिजा हेर्न सकिनेछ । यद्यपि, भर्खरै मात्र आइपीओ बाँडफाँड भएकाले नतिजा आउन केही समय लाग्ने जनाइएको छ ।
