काठमाडौं, ११ असार । बाढीले मेलम्ची नगरपालिका–११ स्थित फट्टेको अस्थायी पुलमा क्षति पुगेको छ।
बाढीको त्रासले मध्यरातमा हेलम्बु र मेलम्ची आसपासका स्थानीयवासी घर छोडेर सुरक्षित स्थानमा गएका थिए।
हेलम्बु–२ का प्रभा भण्डारीले राति १२ बजे घर छोडेर अग्लो स्थानमा गएर बसेको जानकारी दिइन्।
गत वर्ष असार १ गते आएको बाढीले मेलम्चीको पक्की पुल बगाएपछि अस्थायी पुलको रूपमा ह्युमपाइप हालिएको थियो।
स्थानीय दशरथ दनुवारले अस्थायी पुलमा क्षति पुगेसँगै सडक बन्द भएको बताए। यसबाट ६ वडाका बासिन्दा प्रभावित भएका छन्।
अघिल्लो वर्ष असार १ र साउन १६ मा आएको बाढीले हेलम्बु र मेलम्चीमा रहेका मोटरेबल र झोलुङ्गे पुलमा क्षति पुगेको थियो । हिउँदमा सहज भए पनि वर्षायाम लागेसँगै स्थानीयलाई आवतजावतमा समस्या भएको छ ।
वैकल्पिक बाटो प्रयोग गर्दा लामो समय लाग्ने गरेको छ । हेलम्बुको चनौटेमा सेनाले बेलिबृज बनाएको छ भने मेलम्चीमा बाहुनेपाटी पुग्नुपर्ने बाध्यता रहेको छ।
