काठमाडौं । वन तथा वातावरण मन्त्री प्रदीप यादवले मुआब्जा पाइसकेको जग्गा खाली नहुँदासम्म र बजेटको सुनिश्चितता नहुँदासम्म एउटा रुख पनि काट्न नदिने बताएका छन् ।
निजगढमा बन्ने अन्तर्राष्ट्रिय विमानस्थलका लागि मुआब्जा पाइसकेका टाँगियाबस्ती खाली गराएर विमानस्थल निर्माणका लागि आवश्यक पर्ने बजेटको सुनिश्चितता भएमात्रै रुख कटानका लागि वन मन्त्रालयबाट अनुमति दिने मन्त्री यादवले बताएका हुन् ।
सर्लाहीको ईश्वरपुर नगरपालिका वडा नम्बर ४ स्थित सागरनाथमा निर्मित सशस्त्र वन रक्षक ब्यारेक भवनको उद्घाटन गर्दै मन्त्री यादवले निजगढ विमानस्थल मधेशको लाईफलाइन भएको हुँदा आफु त्यसको विरोधी नभएको स्पष्ट पारे ।
उनले भने ‘रुख काटेर जग्गा खाली गराउने, अनि फेरी बस्ती बसाल्ने र मुआब्जा दिने,यस्तो अब चल्दैन । पहिला मुआब्जा पाएको जग्गा खाली गराएर बिमानस्थलका लागि आवश्यक पर्ने बजेटको सुनिश्चितता नभएसम्म एउटा पनि रुख काट्न मन्त्रालयले अनुमति दिँदैन ।’
वन माफियालाई तह लगाउनका लागि कुनै पनि कदम चाल्न पछि नहट्ने बताउदै मन्त्रालयको निर्देशन बमोजिम वन जङ्गलको संरक्षणका लागि काम गर्न निर्दिष्ट गरे । वन मन्त्रालय ताली खाने नभएर गाली खाने मन्त्रालय भएको हुँदा गाली सहेर पनि वन जङ्गल संरक्षण तदारुकता देखाउन उनले आग्रह गरे ।
तस्करसँग मिलेर काठ, ढुंगा र गीटको लाइन दिने जस्ता गुनासोहरु सुनिएको बताउँदै मन्त्रालयको निर्देशनको पालना गर्न आग्रह गर्नुभएको छ ।
राम्रो काम गर्नेलाई सम्मान र नराम्रो गर्नेलाई दण्डित गर्ने हुँदा सम्मान पाउने लायकको काम गर्न पनि निर्देशन दिए । केही समयभित्रै वन मन्त्रालयले सम्मान कार्यक्रमको आयोजना गर्ने हुँदा त्यसका लागि आवश्यक तयारी पनि भइरहेको मन्त्री यादवको भनाई छ ।
त्यसैगरी मन्त्री यादवले सुकुम्वासीको नाममा धनाढ्यहरुले पनि जग्गा कब्जा गरेर राखेको बताउँदै अबदेखि असली सुकुमवासीको पहिचान गरेर मात्र जग्गा दावी पूर्जा वितरण गरिने चेतावनी दिए ।
‘सुकुमवासीको पूर्जा लिएर काठमाडौँ र ठूलाठूला शहरमा आलिसान घर, गाडी भएकाहरु पनि छन्, म त्यस्ता सयौँलाई चिन्छु उनले भने लाखौँको सुनको सिक्री लगाएर म सुकुमवासी भन्नेहरुको पहिचान गरेर अबदेखि सही व्यक्तिलाई मात्र हामीले जग्गा दावी पूर्जा वितरण गर्छौं’ ।
सो अबसरमा मन्त्रीले बाघको संख्या बढेको भन्दै विश्वव्यापी रुपमा नेपालको चर्चा चलीरहेको र बाघ हेर्न आउने पर्यटकलाई बढावा दिनुपर्नेमा जोड दिए ।
वन तथा भू–संरक्षण विभागको वार्षिक कार्यक्रमअन्र्तगत निर्मित भवनको उद्घाटनपश्चात आयोजित कार्यक्रमलाई सम्बोधन गर्ने क्रममा उनले वन रक्षकमा अपर्याप्त जनशक्ति हुँदा अपेक्षित काम हुन नसकेको हुँदा केही दिनभित्रै केही संख्यामा बन रक्षक भर्ना गरिने जानकारी दिए ।
