काठमाडौं । निहारिका राजपूतले राष्ट्रपति भवन शीतल निवास अगाडि आत्मदाहको प्रयास गरेकी छन्।
शुक्रबार दिउँसो करिब सवा ३ बजे उनले आफ्नो जीउमा पेट्रोल छर्केर आत्मदाहको प्रयास गरेकी हुन् ।
आफू बलात्कृत भएको र प्रशासनले कानूनी लडाइँमा सहयोग नगरेको गुनासोसहित आन्दोलनरत २० वर्षकी निहारिकाले सुरक्षार्थ तैनाथ प्रहरीले तत्कालै उद्धार गरेका कारण आगो लगाउन पाइनन्।
शीतल निवासबाट उद्धार गरेर उनलाई उनलाई उपचारका लागि त्रिवि शिक्षण अस्पताल लगिएको जिल्ला प्रहरी परिसर काठमाडौंले जानकारी दिएको छ।
महोत्तरीको जलेश्वर नगरपालिका ९ की सोनालीकुमारी सिंह ‘निहारिका’ यसअघि ८ दिनसम्म अनसनमा बसेकी थिइन्। त्यतिबेला सरकारसँग ५ बुँदे सहमति गरेपछि अनसन तोडेकी थिइन्।
आफूमाथि जनकपुरका शिवराज श्रेष्ठले बलात्कार गरेर त्यसको तस्वीर र भिडियो पनि बनाएर ब्ल्याकमेल गरेको उनको भनाइ छ ।
श्रेष्ठलाई जिल्ला अदालत धनुषाले २४ माघ २०७८ मा सफाइ दिएको छ । त्यसविरुद्ध उनी उच्च अदालत जनकपुर पुगेकी छन् । मुद्दा अदालतमा विचाराधीन छ ।
