काठमाडौं । राष्ट्रपति रामचन्द्र पौडेलको भारतको दिल्लीमा उपचार गर्दा भएको खर्च निकासाका लागि परराष्ट्र मन्त्रालयले अर्थ मन्त्रालयलाई पत्राचार गरेको छ ।
भारतमा गरिएको उपचार खर्च आफैं बेहोर्ने इच्छा व्यक्त गरेको भन्दै राष्ट्रपतिको कार्यालयले विज्ञप्ति जारी गरेको भए पनि परराष्ट्र मन्त्रालयले उपचार खर्चवापतको बिलअनुसार ५५ लाख २ हजार २७९ रुपैयाँ रकम माग गर्दै सोमबार अर्थ मन्त्रालयलाई पत्र लेखेको छ ।
अर्थ मन्त्रालयले राष्ट्रपतिको उपचारको बिल भर्पाइका लागि ५५ लाख ४ हजार ६५४ रुपैयाँसम्म दिन सकिने सहमति गरेको परराष्ट्रको पत्रमा उल्लेख छ । प्रचलित कानुन तथा स्वीकृत मापदण्डअनुसार अर्थको सहमति आएकाले सोमबार मात्रै परराष्ट्र मन्त्रालयले सचिवस्तरको निर्णय गरी उपचार खर्च भुक्तानी माग गरेको छ ।
भारतमा उपचारका क्रममा लागेको खर्च भने सरकारबाट नलिने चाहना राष्ट्रपतिले व्यक्त गरेका थिए । सो खर्च भारत सरकारले व्यहोर्ने वा दिल्लीस्थित दूतावासमार्फत नेपाल सरकारले व्यहोर्ने भन्ने औपचारिक जानकारी सरकारले दिएको छैन ।
