काठमाडौं । नेपाल नागरिक उड्डयन प्राधिकरणका महानिर्देशक प्रदीप अधिकारीलाई संस्कृति, पर्यटन तथा नागरिक उड्डयन मन्त्री सुदन किरातीले दोस्रो स्पष्टीकरण सोधेका छन् ।
मन्त्री किरातीले सोधको पत्रको जवाफ दिन अस्वीकार गरेका अधिकारीलाई मन्त्रालयले दोस्रो पटक तीन दिने स्पष्टीकरण सोधेको हो ।
मन्त्री किरातीले असार ११ गते मन्त्रीस्तरिय निर्णय गर्दै महानिर्देशक अधिकारीसँग पहिलोपटक ९ बुँदे प्रश्न सोधका थिए । ७ दिनभित्र जवाफ दिन निर्देशन दिए पनि आफूलाई मन्त्रीले प्रश्न सोध्न नपाउने तर्क गर्दै अधिकारीले मन्त्रीले सोधको जवाफ दिन अस्वीकार गरेका थिए ।
विभिन्न सञ्चार माध्यममा अधिकारीले आफूलाई मन्त्रिपरिषदले नियुक्त गरेकाले मन्त्रिपरिषद्ले नै स्पष्टीकरण सोध्नु पर्ने बताएका थिए । अब तीन दिन भित्र पनि जवाफ नआएमा भने कानून अनुसार प्रक्रिया अगाडि बढ्ने स्पष्टीकरण पत्रमा उल्लेख छ ।
