काठमाडौं, २२ असार । वातावरणीय, सामाजिक तथा सुशासन (ईएसजी) सम्बन्धी गतिविधिहरुको संचालनका लागि बैंक तथा वित्तीय संस्था परिसंघ नेपाल (सिबिफिन), डोल्मा कन्सल्टिङ र इन्भेष्ट फर इम्प्याक्ट नेपाल (आईआईएन) ले सहकार्य गर्ने भएका छन् ।
सहकार्यका लागि तीन संस्थाहरुले बिहीबार काठमाडौंमा एक सम्झौतापत्रमा हस्ताक्षर गरेका छन् । सिबिफिनका अध्यक्ष पवनकुमार गोल्यान, डोल्मा कन्सल्टिङका प्रबन्ध निर्देशक जोसेफ सिल्भानस र आईआईएनका प्रमुख कार्यकारी अधिकृत विवेक श्रेष्ठले सम्झौता पत्रमा हस्ताक्षर गरेका हुन् ।
लगानीकर्ता संस्था तथा कम्पनीले लगानी गर्दा वातावरणीय, सामाजिक र सुशासनको क्षेत्रमा देखिने जोखिमहरुको अध्ययन, मूल्याङ्ककन, सुधार तथा व्यवस्थापन जस्ता साझा हितका कार्यहरुमा संयुक्तरुपमा सहकार्य गर्ने सम्झौताको मुख्य उद्देश्य रहेको सीबीफिनले जनाएको छ ।
प्राकृतिक स्रोत संरक्षण, हरितगृह ग्यास उत्सर्जन, विषाक्त फोहोरको व्यवस्थापन, जलवायु नीति एवं वातावरणीय नियमहरूको पालना, ऊर्जा प्रयोग, फोहोर, प्रदूषण, सामाजिक रुपान्तरणसहित उत्तरदायित्वहरुको वहन, जातीय, लिंग, र यौन भेदभाव र समावेशीकरणलगायत विषयमा कार्यशाला गोष्ठी, सेमिनार, अन्तरक्रियाजस्ता अभिमुखीकरण कार्यक्रमहरु संचालन गर्ने सम्झौतामा उल्लेख छ ।
त्यसैगरी, स्वास्थ्य एवं सुरक्षा, कम्पनीहरुको आन्तरिक सुशासन र शेयरधारकहरूप्रतिको जिम्मेवारी तथा उत्तरदायित्वलगायतका क्षेत्रहरुमा लगानीको प्रभावका विषयमा पनि यस्ता कार्यक्रमहरु चलाउन सकिने बताइएको छ ।
सम्झौता अनुसार सिबिफिनले कुनै आर्थिक व्ययभार नपर्ने गरी बैंक तथा वित्तीय क्षेत्रको सुधार एवं दिगो विकासका लागि सार्वजनिक–निजी संवाद, अध्ययन तथा अनुसन्धानका गतिविधिहरूको संचालन, ग्रीन फाइनान्सिङ, लगानीका क्षेत्रहरुको पहिचान, पूँजी निर्माण तथा लगानी प्रवद्र्धन, उत्पादनमुलक, रोजगारमुलक र निर्यातमूलक क्षेत्रहरुमा लगानी विस्तार, एसएमइजको प्रवद्र्धन र वित्तीय समस्याहरूको समाधान जस्ता विषयहरुमा बैंक तथा वित्तीय संस्थाहरुसँग सहकार्य गरी बहस पैरवी गर्ने विज्ञप्तिमा उल्लेख छ ।
त्यसैगरी डोल्मा कन्सल्टिङले स्रोत व्यवस्थापन, ईएसजी गतिविधिहरूलाई दिगो बनाउनका लागि क्षमता विकासका गतिविधिहरूको तर्जुमा, सञ्चालन, व्यवस्थापन, अनुगमन तथा मूल्याङ्कनसहित जानकारीहरुको आदानप्रदान गर्ने कार्यहरु गर्नेछ भने आईआईएनले समग्र गतिविधिहरुको कार्यान्वयनको समग्र पर्यवेक्षण, स्रोत पहिचान तथा परिचालन, ईएसजीको प्रवद्र्धन गर्न आवश्यक अन्य वकालतका कार्यहरु गर्ने बताइएको छ ।
सम्झौता हस्ताक्षर कार्यक्रममा सिबिफिनबाट वरिष्ठ उपाध्यक्ष भोजबहादुर शाह, उपाध्यक्ष राजेश उपाध्याय, महासचिव राजन सिंह भण्डारी, कोषाध्यक्ष तुल्सराम अग्रवाल, सचिव कुश प्रसाद मल्ली, महानिर्देशक डा. गोपाल प्रसाद तिवारी, डोल्मा कन्सल्टिङबाट लगानी निर्देशक दिपेन्द्र श्रेष्ठ र आईआईएनबाट रोशनी काफ्लेको उपस्थिति रहेको थियो ।
