काठमाडौं । जागिरको प्रलोभन देखाएर बंगलादेशदेखि नेपाल बोलाएर बन्धक बनाउँदै फिरौती उठाउने गरेको आरोपमा प्रहरीले ६ जनालाई पक्राउ गरेको छ। पक्राउ पर्नेमा चारजना बंगाली र दुईजना नेपाली नागरिक छन् ।
प्रहरीको उपत्यका अपराध अनुसन्धान कार्यालयको टोलीले पक्राउ गरेर आइतबार सार्वजनिक गरेको हो । बन्धक बनाउँदै परिवारसँग फिरौती माग गर्ने समूहका ६ जनालाई विभिन्न ठाउँबाट पक्राउ परेका प्रहरीले जनाएको छ ।
पक्राउ पर्नेमा बंगलादेशका ४७ वर्षीय अमिर हुसेन, ३८ वर्षीय सलिम मिया, ३७ वर्षीय एमडी मोसिउर रहमान र २१ वर्षीया जहन्जिर आलम छन् ।
त्यस्तै, नेपाली नागरिक इलामकी ३३ वर्षीया रोशनी राई र सिन्धुपाल्चोक बलेफीकी २७ वर्षीया तारा नेपाली छन् ।
उनीहरूले पीडित परिवारबाट १० लाख रुपैयाँ लिएको समेत खुलेको छ । उनीहरूले पीडितलाई विभिन्न होटेलमा लिएर बन्धन बनाएर राख्ने गरेको प्रहरीले जनाएको छ ।
उनीहरूविरुद्ध मुलुकी अपराध संहिता २०७४ को दफा २११ र २१२ तथा संगठित अपराध निवारण ऐन २०७० बमोजिमको कसुरमा अनुसन्धान अघि बढाइएको छ।
