नयाँ दिल्ली । भारत सरकारले प्याजको बढ्दो मूल्यलाई नियन्त्रण गर्न प्याजको निर्यातमा प्रतिटन न्यूनतम ८०० अमेरिकी डलरको निर्यात मूल्य अधिसूचित गरेको अधिकारीहरूले बताएका छन् ।
घरेलु बजारमा प्याजको उपलब्धता कायम राख्न पनि यो कदम चालिएको अधिकारीहरूले बताएका छन् । संघीय उपभोक्ता मामिला, खाद्य तथा सार्वजनिक वितरण मन्त्रालयका अनुसार यो सूचना आइतबारदेखि लागू हुनेछ र डिसेम्बर ३१ सम्म लागू हुनेछ ।
उक्त निर्णयसँगै सरकारले प्याजको मूल्य स्थिर राख्न विदेशबाट थप दुई लाख टन प्याज खरिद गर्ने घोषणा गरेको छ भने ५ लाख टनभन्दा बढी प्याज खरिद भइसकेको मन्त्रालयले जनाएको छ ।
पछिल्लो दुई सातामा भारतमा प्याजको मूल्य ५० प्रतिशतभन्दा बढीले वृद्धि भएको समाचारमा जनाइएको छ ।
भारतले प्याज निर्यातको मूल्य तोकेसँगै नेपालमा प्याजको भाउ झनै बढ्ने देखिएको छ । नेपाली आयतकर्ताले भारतबाट प्याज आयात गर्दा प्रतिकिलो १०० रुपैयाँ बढी पर्ने भएको छ । नेपाल र भारत सरकारले लगाएको दोहोरो करका कारण जेठ यता नेपाली बजारमा प्याजको भाउ झन्डै तेब्बरले बढिसकेको छ ।
भारतको नयाँ व्यवस्थाले प्याजको मूल्य महिँगएकाले नेपालममा कम आयात हुने देखिएको छ । आन्तरिक उत्पादनले माग नधान्ने र भारतबाट आयात गर्दा पनि महँगो हुने भएको छ ।
