काठमाडौं । रास्वपा सभापति रवि लामिछानेले नियतबस आफूले कहीँ कतै सहकारीको हिनामिना गर्ने कार्यमा संलग्नता नभएको प्रष्टीकरण दिएका छन् । रास्वपाद्वारा बिहीबार आयोजित सार्वजनिक सुनुवाइ कार्यक्रममा बोल्दै उनले यस्तो बताएका हुन् । उनले आफ्नो बारे भएको टिकाटिप्पणीप्रति ध्यानाकर्षण भएको बताए ।
अनवाश्यकरूपमा सहकारीसँग आफ्नो नाम जोडेको उल्लेख गर्दै उनले भने— अन्तिसम्म लडाइँ लड्ने को हो भन्दा रवि लामिछाने भन्नुहोला । म बचतकर्ताहरूले आफ्नो लगानी एक/एक पैसा प्राप्त नगरेसम्म लड्छु । म बचतकर्ताहरूको पक्षमा लड्छु ।
यस्तै उनले आफू मुलुकको चौथो ठूलो दलको नेतृत्व भएकाले चितवनमा मात्रै सीमित हुन नहुने बताए । आफ्नो संसदीय कार्यकालको पहिलो वर्षलाई आफूले ‘योजना तर्जुमा’को वर्ष भनेको स्मरण गराउँदै उनले भने— अहिले योजनाहरू तर्जुमा गर्दैछु । अझै ४ वर्ष बाँकी छ । त्यो ४ वर्षभित्र मैले काम गर्नेछु ।
