काठमाडौं । राष्ट्रिय किक्रेट टोलीका लेग स्पिनर सन्दीप लामिछाने राष्ट्रिय टोलीबाट निलम्बनमा परेका छन् । जिल्ला अदालत काठमाडौंले बलात्कार मुद्दामा दोषी ठहर गरेसँगै उनी राष्ट्रिय क्रिकेट टोलीबाट प्रतिस्पर्धा गर्न नपाउने भएका छन् ।
नेपाल क्रिकेट संघ (क्यान) का अध्यक्ष चतुरबहादुर चन्दका अनुसार अर्को कुनै आदेश नहुँदासम्म उनी नेपाली टोलीमा रहने छैनन् भने अर्को आदेशबाट सफाइ पाएको खण्डमा भने उनी राष्ट्रिय टोलीमा हुने छन् ।
सन्दीपलाई हुने सजायबारे पुस २५ गते टुंगो लाग्नेछ । १० वर्षभन्दा कम सजाय तोकिएको मुद्दामा प्रतिवादीले थुनाबाहिरै रहेर उच्च अदालतमा पुनरावेदन गर्न पाउने कानुनी व्यवस्थासमेत छ । त्यसैले उनले जेलबाहिरै रहेर पुनः उच्च अदालतमा मुद्दा लड्न पाउने छन् ।
