काठमाडौं । साउदी अरवमा प्रतिवन्धित मदिराको कारोबार तथा सेवनको अभियोगमा सयौं नेपाली जेलमा रहेको खुलेको छ । साउदी अरब नेपालको एउटा प्रमुख श्रम गन्तव्य हो र त्यहाँ झन्डै चार लाख नेपाली छन् ।
रियादस्थित नेपाली राजदूतावासका प्रथम सचिवले बीबीसीसँग कुरा गर्दै बढी आम्दानी हुने लोभले नेपालीहरू मदिरा सेवन र बेचबिखनसँग सम्बन्धित कसुरमा जेल पर्ने गरेको पुष्टी गरेका हुन् ।
साउदी अरबसहितका श्रम गन्तव्य प्रस्थान गर्नुअघि दिइने अभिमुखीकरण कार्यक्रमहरूमा ती देशमा गर्न नहुने गतिविधिहरूबारे जानकारी गराउने गरिएको छ ।
तर, यो प्रभावकारी नहुँदा नेपालीले यस्तो काम गरिरहेका छन् । रियादस्थित नेपाली राजदूतावासले साउदी अरबको जेल प्रशासनले उपलब्ध गराएको आँकडालाई उद्धृत गर्दै ४८० जना जति नेपाली उक्त खाडी देशका जेलहरूमा रहेको जनाएको छ।
वास्तविक सङ्ख्या त्यो भन्दा बढी हुनसक्ने बताइएको छ । राजदूतावासका प्रथम सचिव टोपनारायण गिरीले ८० देखि ८५ प्रतिशत नेपालीहरू मदिरा सेवन, ओसारपसार र उत्पादनको कसुरमा जेलमा रहेको बताएका छन् ।
सात दशकदेखि मदिरामाथि प्रतिबन्ध लगाएको साउदी अरबमा मदिरा राख्ने वा बेचबिखन गर्नेलाई जरिवाना गराउने देखि जेलमा थुन्ने र कोर्रा हान्नेसम्मको सजाय तोकिएको छ। यसका वावजुत ठूलो संख्यामा नेपालीले यो काम गरेको खुलेको हो । उता, साउदीले भने अब मदिरा खुला गर्ने योजना बनाइरहेको छ ।
