काठमाडौं, ७ असोज । भनिन्छ, राजनीतिक दलहरु गतिशिल हुन्छन् । समयअनुसार आफूलाई रुपान्तरण गर्दै समाजलाई नेतृत्व प्रदान गर्छन् ।
तर, नेपालका एक पार्टीमा नेतृत्वले कीर्तिमान कायम गरेको छ । त्यो हो नेपाल मजदुर किसान पार्टी । यसको अध्यक्ष रहेका नारायणमान विजुक्छे पछिल्लो ४४ वर्षयता पार्टी अध्यक्ष रहेका छन् ।
उनलाई पार्टीले आगामी कार्यकालका लागि समेत नेतृत्वमा चयन गरेको हो । नेमकिपाको सोमबार भक्तपुरमा सम्पन्न सातौं महाधिवेशनले अध्यक्ष चयन गरेको हो ।
खासगरी उत्तर कोरियाली शासन व्यवस्था अंगिकार हुनुपर्छ भन्ने मान्यता राख्ने यो पार्टी सन् १९७५ मा स्थापना भएको हो ।
सोही समयदेखि नै नारायणमान यस पार्टीको अध्यक्ष रहँदै आएका छन् । पार्टीमा उनलाई टक्कर दिने अर्को पुस्ता नै जन्मिएको छैन ।
महाधिवेशनबाट अध्यक्षसहित ६ सदस्यीय नयाँ कार्यसमिति चयन गरेको छ ।
यस कार्यसमितिमा प्रेम सुवाल, सुनील प्रजापति, मोहनप्रसाद प्रजापति, डिल्लीप्रसाद काफ्ले, नवराज कोइराला, जग्यबहादुर शाही रहेको पार्टीले उल्लेख गरेको छ ।
साथै, सनकमान महर्जन, नन्दबहादुर शाही, बजिरसिं विश्वकर्मा, नर्मा गुरुङ, नारायण महर्जन, सरोजराज गोसाई, उकेश कवां, खगेन्द्रबहादुर शाही, कृष्णकुमार वैद्य, अनुराधा थापामगर समेत सदस्य बनेका छन् ।
नेमकिपा खासगरी भक्तपुरमा सक्रिय रहेको छ । यहाँका आदिवासी नेवार समूदायका राम्रो साथ पाएका कारण नेमकिपाले हरेक निर्वाचनमा राम्रो नतिजामा चुनाव जित्ने गर्छ ।
