क्लाउडपत्रिका
काठमाडौं, १३ फागुन
चालु आर्थिक वर्षबाट करीव तीन लाख राष्ट्रसेवक कर्मचारीको सावधिक जीवन बीमा पूर्ण सरकारी स्वामित्वको राष्ट्रिय बीमा संस्थानबाट कार्यान्वयनमा आएको छ । संस्थानका प्रशासक कवि प्रसाद पाठकका अनुसार संस्थानमा अहिले व्यक्तिगत जीवन बीमातर्फ करिब दुई लाख ९८ हजार बीमित छन् । यसै वर्षबाट करीब तीन लाख राष्ट्रसेवक कर्मचारीको सावधिक जीवन बीमा पनि थप गरिएको छ । अन्य ठूला बैंक तथा सार्वजनिक संस्थानका कर्मचारीको बीमासमेत संस्थानले गर्दै आएको उनले जानकारी दिए ।
संस्थानले यसैसाता आफ्नो स्थापनाको ५१ औं वार्षिकोत्सव मनायो । २०२४ साल पुस १ गते नेपाल सरकारको स्वामित्वमा राष्ट्रिय बीमा संस्थान (प्रा.) लि. स्थापना भएको थियो । सोही कम्पनीले फागुन ११ गतेदेखि व्यावसायिक कारोबार शुरु गरेको थियो । राष्ट्रिय बीमा संस्थान ऐन, २०२५ अनुरुप २०२५ साल पुस १ गते संस्थानमा परिणत भई संस्थानले निरन्तर सेवा दिइरहेको छ ।
पहिलो ६ महिनामा चार अर्ब ४१ करोड बीमाशुल्क
बीमा संस्थानको अधिकृत पुँजी रु.५० करोड र चुक्तापुँजी रु.१८ करोड १० लाख २० हजार पुगेको छ । संस्थानले चालु आवको पहिलो ६ मनिामा ४ अर्ब ४१ करोड बीमाशुल्क संकलन गरेको संस्थानका प्रशासक पाठकले जानकारी दिए । यस अवधिमा संस्थानले १ अर्ब ५१ करोड रुपैयाँ दाबी भुक्तानी गरेको छ । २०७५ पुस मसान्तसम्म संस्थानको जीवन बीमा कोष १९ अर्ब २१ करोड रहेको उनको भनाइ छ ।
संस्थानको लगानी दीर्घकालिन परियोजनामा
बीमा संस्थानले अहिले दीर्घकालीन परियोजनामा लगानी गर्ने प्रयास थालेको छ । कम्पनीका अनुसार माथिल्लो तामाकोशी जलविद्युत आयोजनामा रु. २१ करोड १८ लाख शेयर पूंजी र दुई अर्ब ऋण लगानी, जलविद्युत लगानी तथा विकाश कम्पनीमा १ अर्ब शेयर लगानी र विद्युत उत्पादन कम्पनीमा ६ करोड ६० लाखको संस्थापक शेयर लगानी रहेको छ । संस्थानले नेपाल सरकार लगायत संस्थापक शेयरधनीलाई आकर्षक लाभांश र सरकारलाई करको रूपमा समेत करिब ३५ करोड वार्षिक राजस्व बुझाउँदै आएको छ ।
संस्थानमा कसको कति शेयर (प्रतिशत) ?
नेपाल सरकार : २७.७८
नेपाल राष्ट्र बैँक : ५५.५५
नेपाल बैक लिमिटेड : १६.६७
