काठमाडौं । प्रधानमन्त्री केपी शर्मा ओलीले केही विरोधी र अराजक तत्वले अरू कुरा नपाएर स्पेनमा मान्छे छाडेर आयो भनेर झुट र घटिया प्रचार गरेको बताएका छन्। आफ्नो स्पेन भ्रमण सफल भएको पक्षलाई ओझेल पार्ने गरी घटिया प्रचार गरेको भन्दै यस्ता कुराहरूको जबाफ दिन आवश्यक नभएको बताएका हुन्।
झापाको दमक नगरपालिकास्थित मदनडाँगी-ताराबारी-डिपु सडक स्तरोन्नति आयोजनाको आज उद्घाटन गर्दै उनले झुट र घटिया प्रचार गरेकाेमा आक्रोश व्यक्त गरे ।
विश्व बैंकको सहयोगमा नगरपालिकाको गौरवको आयोजनाका रूपमा रहेको सो सडक नेपालभरका १७ सडकमध्ये छानिएको एक हो । रु ४४ करोड २४ लाख लागतमा निर्माण भएको हाे। ४.८६ किमी सो सडक समयमै सम्पन्न भएको नमूना आयोजना मानिन्छ। साे अवसरमा प्रधानमन्त्री ओलीले मेची महाकालीसम्म थालेका काम सक्ने अभियानमा सरकार रहेको बताए।
