भदौ २३ र २४ को जेनजी आन्दोलनमा भएको क्षतिको परेको बिमा दाबीमध्ये पौने १६ अर्ब रुपैयाँ बिमा कम्पनीहरुले नेपाल पुनर्बीमा कम्पनीमा दाबी गरेका छन् ।
बिहीबारसम्म नेपाल पुनर्बीमा कम्पनीमा निर्जीवन बिमा कम्पनीहरूबाट कुल २ हजार ७ सय ३३ वटा पुनर्बीमा दाबी परेको र पुनर्बीमा दाबी रकम करिव १५ अर्ब ७६ करोड ४३ लाख रहेको बिमा प्राधिकरणले जनाएको छ ।
जसमध्ये पुनर्बीमा कम्पनीले हालसम्ममा करिव १ अर्ब ६३ करोड ३५ लाख अग्रिम (पेश्की) भुक्तानी निर्जीवन बीमा कम्पनीहरूलाई दिएको र ६० वटा दाबीको मूल्याङ्कन तथा अनूगमनका लागि संयुक्त बीमा सर्भेयर खटाएको बताइएको छ ।
आन्दोलनका क्रममा भएका भौतिक तथा अन्य क्षतिको बीमा दाबीको अद्यावधिक तथ्याङ्क निर्जीवन बीमा कम्पनीहरूबाट प्राप्त भएको छ ।
विभिन्न १४ वटा निर्जीवन बीमा कम्पनी र ४ वटा लघु निर्जीवन बीमा कम्पनीमा परेका कूल ३ हजार १६६ वटा बीमा दाबीको करिव २३ अर्ब २० करोड ९१ लाख दाबी रकम रहेको जानकारी निर्जीवन बीमा कम्पनीहरूले दिएका छन् ।
निर्जीवन बीमा कम्पनीहरूबाट प्राप्त पछिल्लो तथ्याङ्क अनुसार, कूल दाबी रकममध्ये हालसम्ममा अग्रिम भुक्तानी समेत गरी करिव २ अर्ब १ करोड ९८ लाख बीमितहरूलाई भुक्तानी भइसकेको बताइएको छ ।
आन्दोलनका क्रममा भएका भौतिक तथा अन्य क्षतिको बीमा दाबीको मूल्याङ्कन एवम् अनुगमनका लागि २ हजार ७९१ वटा दाबीका लागि सर्भेयर खटाइएको र सर्भेयरहरूले हालसम्ममा ६५४ को सङ्ख्यामा सर्भे प्रतिवेदन पेश गरेको जानकारी निर्जीवन बीमकहरूबाट प्राप्त भएको प्राधिकरणले जनाएको छ ।
