काठमाडौं । एशियाली विकास बैंक (एडीबी) ले सोना श्रेष्ठलाई आफ्नो दक्षिण एसिया विभागको महानिर्देशक नियुक्त गरेको छ।
यस पदमा उनले बंगलादेश, भुटान, भारत, माल्दिभ्स, नेपाल र श्रीलंकामा एडीबीको रणनीति तथा कार्यक्रमहरूको विकास र कार्यान्वयनको नेतृत्व गर्नेछिन्।
“दक्षिण एसियाको महानिर्देशकमा नियुक्त हुन पाउँदा म सम्मानित महसुस गरिरहेकी छु,” श्रेष्ठले भनिन्। “क्षेत्रका विकासशील सदस्य राष्ट्रहरूसँग नजिकबाट सहकार्य गर्दै समावेशी र दिगो विकासलाई समर्थन गर्न एडीबीको संलग्नता अझ सुदृढ बनाउन म उत्सुक छु।”
श्रेष्ठ एक अनुभवी विकास नेतृत्वकर्ता हुन्, जससँग २७ वर्षभन्दा बढी पेशागत अनुभव छ, जसमा २३ वर्ष एडीबीमै बिताएकी छन्। यस नियुक्तिअघि उनी दक्षिण एसिया विभागकी उप–महानिर्देशक थिइन्। उनले एडीबीको स्वतन्त्र मूल्यांकन विभागमा उप–महानिर्देशक, सहायक सचिव, दक्षिण–पूर्वी एसियाका लागि वित्तीय क्षेत्र तथा व्यापार डिभिजनमा निर्देशक, तथा इन्डोनेसियाका लागि उप–देश निर्देशकका रूपमा पनि काम गरिसकेकी छन्। एडीबीमा आफ्नो प्रारम्भिक भूमिकाहरूमा उनले मध्य तथा पश्चिम एसिया, दक्षिण एसिया र दक्षिण–पूर्वी एसियाभरि व्यापक सञ्चालन अनुभव हासिल गरेकी छन्।
नेपालकी नागरिक श्रेष्ठले संयुक्त राज्य अमेरिकास्थित क्यालिफोर्निया विश्वविद्यालयबाट अर्थशास्त्रमा विद्यावारिधि (PhD) र स्नातकोत्तर उपाधि प्राप्त गरेकी छन्। साथै उनले म्यासाचुसेट्सस्थित स्मिथ कलेजबाट अर्थशास्त्रमा स्नातक उपाधि हासिल गरेकी छन्।
एडीबी एशिया तथा प्रशान्त क्षेत्रमा समावेशी, उत्थानशील (resilient) र दिगो आर्थिक वृद्धिलाई समर्थन गर्ने अग्रणी बहुपक्षीय विकास बैंक हो। आफ्ना सदस्य र साझेदारहरूसँग मिलेर जटिल चुनौतीहरूको समाधान खोज्दै एडीबीले नवप्रवर्तनशील वित्तीय उपकरण र रणनीतिक साझेदारीमार्फत जीवनस्तर रूपान्तरण, गुणस्तरीय पूर्वाधार निर्माण तथा पृथ्वीको संरक्षणमा योगदान पुर्याउँदै आएको छ। सन् १९६६ मा स्थापित एडीबीका ६९ सदस्य छन्, जसमध्ये ५० सदस्य यसै क्षेत्रका हुन्।
