काठमाडौं, १२ माघ । शेयर बजारको ओरालो यात्रा कायमै रहेको छ ।
साताको कारोबारको चौथोदिन शेयर बजार मापक सूचक (नेप्से) ३८.४५ अंकले घटेर २७७६.६१ विन्दुमा झरेको छ ।
नेपाल स्टक एक्सचेन्जका अनुसार बुधवार २३३ कम्पनीको ४ अर्ब ३१ करोड ३१ लाख ५४ हजार ४२ रुपैयाँ बराबरको ९३ लाख ५८ हजार ७०० कित्ता शेयर किनबेच भएका छन् ।
मंगलवार तुलनामा कारोबार रकममा गिरावट आएको छ । त्यसदिन ५ अर्ब ३९ करोड ५६ लाख ७२ हजार ६२७ रुपैयाँ बराबरको कारोबार भएको थियो ।
आज कारोबारमा आएका १३ वटा समूहको परिसूचक राताम्मे भएका छन् । दोहोरो अंकले घटेको बजारमा बैंकिङ २२, होटल तथा पर्यटन १५, अन्य उपसमूह २४ अंकले घटेको छ ।
निर्जीवन बीमा १४६, उत्पादन समूह ५४, जलविद्युत ५२ अंकले घटेको छ । विकास बैंक ८४, फाइनान्स ५९, लगानी समूह १, माइक्रोफाइनान्स ६३ अंकले र जीवन बीमा समूह २९८ अंकले घटेको छ ।
नेप्सेका अनुसार आज दुई कम्पनीको शेयरमूल्यमा उच्च वृद्धि भएको छ । शेयरमूल्यमा उच्च वृद्धि हुने कम्पनीहरुमा वीन नेपाल लघुवित्त वित्तीय संस्था र बुद्धभूमि नेपाल हाइड्रोपावर कम्पनी रहेको छ ।
यी दुबै कम्पनीको शेयरमूल्यमा सकारात्मक सर्किट लागेको छ । कारोबारको आधारमा आज सबैभन्दा बढी एसियन लाइफ इन्स्योरेन्स कम्पनीको भएको छ । यस कम्पनीको आज २६ करोड ९४ लाख भन्दा बढीको कारोबार भएको छ ।
त्यस्तै, पोखरा फाइनान्सको शेयरमूल्यमा सर्वाधिक गिरावट आएको छ । यस कम्पनीको शेयरमूल्य ५ प्रतिशत भन्दा बढीले घटेको छ । सेन्टर फाइनान्स र मानुषी लघुवित्तका शेयरधनीले ४ प्रतिशत गुमाएका छन् ।
त्यसैगरी, सानीम इक्वीटी फण्ड, घलेम्ली हाइड्रोपावर, एशियन लाइफ इन्स्योरेन्स, एनआइबीएल समृद्धि फण्ड २, वरुण हाइड्रोपावर, ग्रीन डेभलपमेन्ट बैंक, हिमालयन पावर, खानी खोला, कुमारी बैंकको डिबेञ्चर र हिमालयन ऊर्जा कम्पनीको शेयर मूल्य ३ प्रतिशभन्दा धेरैले घटेको छ ।
