काठमाडौं, १५ माघ । काठमाडौं उपत्यकामा सार्वजनिक यातायातमा जोरविजोर प्रणाली आजबाट हटेको छ ।
शुक्रबार बसेको उपत्यकाका प्रमुख जिल्ला अधिकारी (सिडिओ) हरुको बैठकले माघ ७ गतेबाट लागू गरिएको जोरविरोज प्रणाली हटाउने निर्णय गरेको हो ।
सार्वजनिक यातायातका सवारी साधनमा जोरविरोज हटाइए पनि निजी सवारी साधन र ट्याक्सीमा भने जोरविजोर प्रणाली कायमै राखिएको छ ।
कोभिड महामारी नियन्त्रण र रोकथामका लागि भन्दै स्मार्ट लकडाउन सम्बन्धी कार्यविधिअनुसार प्रशासनले नयाँ आदेश जारी गरेको छ ।
विश्वविद्यालय, विद्यालयमा भौतिक उपस्थितिमा पठनपाठन नगर्ने आदेशलाई माघ मसान्तसम्म लम्ब्याइएको छ ।
बैठकले स्कुल तथा कलेजहरु आगामी माघ मसान्तसम्म भर्च्युअल रुपमै सञ्चालन गर्ने निर्णय गरेको हो । फिल्म हल र रात्रिकालीन व्यवसाय पनि माघ मसान्तसम्म बन्द रहने आदेशमा उल्लेख छ ।
यस्तै कोरोना भाइरसको जोखिम कायमै रहेकाले अन्य क्षेत्रमा भने स्वास्थ्य मापदण्डको पालना गर्न पनि कार्यालयले आग्रह गरेको छ ।
