काठमाडौं, १२ फागुन । निजी हवाई सेवा प्रदायक कम्पनी बुद्ध एयरले बुधबार साँझ थप एटीआर–७२ जहाज भित्र्याएको छ ।
आन्तरिक उडानमा सबैभन्दा बढी बजार हिस्सा लिइरहेको बुद्ध एयरले बजार विस्तारकै लागि थप विमान भित्र्याएको हो।
कलसाईन (एन–एआरपी) रहेको जहाजको आवश्यक कागजी प्रक्रिया पुर्याएर २ साताभित्र उडान सेवा दिने प्रेस विज्ञप्तिमार्फत जनाएको छ ।
ठूला जहाजबाट उडान भर्दा सञ्चालन खर्च कम हुने र हवाईभाडादर पनि स्वतः सस्तो र सहज हुन्छ । त्यही अनुरुप बुद्ध एयरले ७२ सिटे जहाज भित्र्याएको हो ।
यससँगै बुद्ध एयरको जहाज संख्या १६ पुगेको छ । जसअनुसार ११ वटा एटीआर–७२, ३ वटा एटीआर–४२ र २ वटा बिचएयरक्राफ्ट जहाज रहेका छन् ।
बुद्ध एयर निरन्तर सहज र सरल भाडादरको लागि प्रतिवद्ध छ । गएको जनवरी महिनादेखि अन्तरर्राष्ट्रिय यात्रुतर्फको ‘डलर’ हवाई भाडादर ८० प्रतिशतले घटाएको छ ।
त्यस्तै नेपालमै ६ महिना अवधि बसाई गरेका अन्तर्राष्ट्रिय नागरिकहरुको हकमा यसअघि ७५ प्रतिशतले बढी रहेको भाडादर पनि घटाएको छ । सस्तिएको भाडादरले पर्यटक भित्र्याउन ठूलो मद्दत गर्ने बुद्ध एयरले विज्ञप्ति मार्फत जनाएको छ । यसबाट पर्यटन क्षेत्रलाई पनि ठूलो टेवा पुग्नेछ ।
नेपाली यात्रुहरुका लागि पनि बुद्ध एयरले हवाई उडानलाई सहज र सरल बनाएको छ । सस्तो भाडासँगै उडान संख्या उल्लेख्य मात्रामा वृद्धि गरेको छ, जसअनुसार यात्रुहरु आफ्नो समय अनुकल उडान भर्नसक्छन् । आन्तरिकतर्फ हवाई यात्रा समग्र रुपमै सस्तिएको छ ।
‘बुद्ध एयर निरन्तर हवाईयात्रालाई सबैको पहुँच बनाएका छन् र यसलाई अझ सहज बनाउन प्रतिवद्ध रहेको’ बुद्ध एयरका बजार निर्देशक रुपेश जोशीले बताए । उनले थप ३ वटा जहाज केही महिनामै भित्र्याउने समेत बताए ।
बुद्ध एयरले पोखरालाई देशका विभिन्न गन्तव्यसँग सिधा उडान भरिरहेको छ । नेपालगञ्ज, भैरहवा, भरतपुर र सिमराबाट उडान भइरहेको र मार्च १ देखि जनकपुर र धनगढीबाट पनि उडान शुरु गर्न लागेको छ । त्यस्तै मार्चको १५ देखि भद्रपुरबाट पोखरा र विराटनगरबाट भैरहवा उडान भर्ने योजना पनि रहेको जनाएको छ ।
अन्तर्राष्ट्रिय पर्यटकहरु नेपाल आउन आतुर रहेका छन् । पीसीआर परीक्षण र झन्झिटिलो फारमहरुलाई सहजीकरण गर्न बुद्ध एयर सम्बन्धित निकायहरुलाई अनुरोध गरेको प्रेस विज्ञप्तिमार्फत पनि जनाएको छ ।
