काठमाडौं । श्वेत गंगा हाइड्रोपावर एण्ड कन्स्ट्रक्सन लिमिटेडले आज (जेठ २३ गते)देखि प्राथमिक साधरण सेयर (आइपीओ) निष्काशन गर्ने भएको छ।
कम्पनीले आयोजना प्रभावित क्षेत्र रामेछाप र ओखलढुंगाका स्थानीयका लागि आइपीओ जारी गरेको हो । कम्पनीले प्रतिकित्ता १०० रुपैयाँदरले १५ करोड ९३ लाख रुपैयाँ बराबरको १५ लाख ९३ हजार कित्ता सेयर विक्रीमा ल्याएको हो ।
निष्काशन भएको कुल सेयरमध्ये आयोजनाको संरचना रहेको रामेछापको (लिखु तामाकोशी गाउँपालिकाको वडा नं. २, ३ र ४) र ओखलढुंगा (लिखु गाउँपालिकाको वडा नं. ४, ५, ६, ७, ८ र ९ )का बासिन्दाका लागि ७० प्रतिशत (११ लाख १५ हजार १०० कित्ता) सेयर छुट्याइएको छ ।
त्यसैगरी, आयोजनाको प्रसारणलाइन पर्ने रामेछापको लिखु तामाकोशी गाउँपालिकाको वडा नं. ५, ६ र ७ र मन्थली नगरपालिकाको वडा नं. ११, १२ र १३ र रामेछाप नगरपालिकाको वडा नं. १ र ३ का बासिन्दाका लागि २५ प्रतिशत (३ लाख ९८ हजार २५० कित्ता) र रामेछापको लिखु तामाकोशी गाउँपालिकाको वडा नं. १ र ओखलढुंगाको लिखु गाउँपालिकाको वडा नं. १, २ र ३ लाख ५ प्रतिशत (७९ हजार ६५० कित्ता) सेयर छुट्याइएको छ ।
कम्पनीको आइपीओमा स्थानीयले असार ६ गतेसम्म आवेदन दिन सक्नेछन् । सो अवधिमा सबै सेयर विक्री नभएमा ढिलोमा असार २१ गतेसम्म आवेदन दिन पाउने छन् । लगानीकर्ताले न्यूनतम १० कित्तादेखि अधिकतम १० हजार कित्ताका लागि आवेदन दिन सक्नेछन्।
कम्पनीको आइपीओमा सांग्रिला डेभलपमेन्ट बैंकको मन्थली शाखा, नेपाल एसबीआई बैंकको यसम शाखा र कम्पनीको आयोजनास्थलहरुबाट आवेदन दिन सकिनेछ। साथै, नेपाल धितोपत्र बोर्डबाट अनुमति प्राप्त सम्पूर्ण सी–आस्वा सदस्य बैंक तथा वित्तीय संस्था र तिनका शाखा कार्यालयबाट आवेदन दिन सकिनेछ।
कम्पनीको सेयर निष्काशन तथा विक्री प्रबन्धक सानिमा क्यापिटल लिमिटेड रहेको छ । कम्पनीको आइपीओलाई रेटिङ एजेन्सी केयर रेटिङ नेपालले ‘केयरएनपी डबल बी आइएस’ रेटिङ प्रदान गरेको छ। यसले कम्पनीको दायित्व बहन गर्ने क्षमतामा मध्यम जोखिम रहेको संकेत गर्दछ ।
कम्पनीले रामेछापको लिखु तामाकोसी गाउँपालिका र ओखलढुङ्गाको लिखु गाउँपालिकाको सिमाना भएर बहने लिखु नदीमा २८.१ मेगावाट क्षमताको तल्लो लिखु जलविद्युत् आयोजना निर्माण गरिरहेको छ ।
