काठमाडौं, ६ असार । इण्डियन आयल कर्पोरेशन (आईओसी) ले नेपाल पठाउने पेट्रोलियम पदार्थको मूल्य पुनः बढाएको छ ।
नेपाल आयल निगम (एनओसी) ले दिएको जानकारी अनुसार आईओसी र एनओसीबीचको सहमतिअनुरुप आइतवार राति १२ बजेदेखि लागु हुनेगरी पेट्रोलमा प्रतिलिटर २१ तथा डिजेल र मट्टितेल मूल्य २७ रुपैयाँ बढाएर पठाएको हो ।
लगातार पेट्रोलियम पदार्थको मूल्य बढेसँगै निगमको घाटा पनि चुलिँदै गएको छ ।
मूल्य समायोजनपछि पनि निगमलाई १५ दिनमा निगमका अनुसार निगमले सबैभन्दा बढी मार एलपी ग्यासमा खाएको छ ।
एलपी ग्यासले मात्र १५ दिनमा एक अर्ब १३ करोड ९७ लाख रुपैयाँ घाटा र मासिक २ अर्ब २८ करोड रुपैयाँ नोक्सानी परेको जनाएको छ । निगमलाई मासिक रुपमा ४ अर्ब ७० करोड रुपैयाँ घाटा रहेको उसले जनाएको छ ।
‘यही असार मसान्तसम्म ५० देखि ५५ अर्ब रुपैयाँ नोक्सानी हुने देखिएको छ’ विज्ञप्तिमा छ ।
पेट्रोलमा प्रतिलिटर १३.५८ रुपैयाँ, डिजेलमा १३.९५ रुपैयाँ र एलपी ग्यासमा प्रतिसिलिण्डर ७५१.१४ रुपैयाँ घाटा पर्ने जनाएको हो ।
निगमले मध्यरातमा जारी गरेको विज्ञप्तिअनुसार एक लिटर पेट्रोलको खरिद मूल्य हाल २१२.५८, डिजेलमा २०५.९५ र एक सिलिण्डर खाना पकाउने ग्यासको खरिद मूल्य २५५१.१५ रुपैयाँ परेको छ ।
निगमलाई मट्टितेल, आन्तरिक र बाह्य इन्धनमा मात्र नाफा छ । मट्टितेलमा प्रतिलिटर ४३.०६ रुपैयाँ, आन्तरिक हवाई इन्धनमा प्रतलिटर १३.६१ रुपैयाँ र बाह्य हवाई इन्धना प्रतिलिटर ५६.६७ रुपैयाँ नाफा छ ।
