काठमाडौं, २० असार । लघुवित्त वित्तीय संस्थाहरु कर्जा लगानीमा आक्रमक देखिएका छन् । लघुवित्त वित्तीय संस्थाहरुको निरीक्षण तथा सुपरिवेक्षण सम्बन्धी वार्षिक प्रतिवेदन यस्तो देखाएको हो ।
नेपाल राष्ट्र बैंकका अुनसार अुनसार आर्थिक वर्ष २०७७/७८ मा सञ्चालित ७० वटा लघुवित्तहरुको कुल निक्षेप तथा सापटीमा ३५.९७ प्रतिशत र कर्जा ३९.१४ प्रतिशतले बढेको छ ।
बैंकका अनुसार २०७८ असारसम्ममा लघुवित्तहरुले ३ खर्ब ३७ अर्ब ६२ करोड रुपैयाँ बराबरको निक्षेप संकलन गरेका छन् । जुन २०७७ असारसम्ममा २ खर्ब ४८ अर्ब ३१ करोड रुपैयाँ थियो ।
त्यस्तै, लघुवित्तहरुले २०७८ असारसम्मा ३ खर्ब ६५ अर्ब ५५ करोड रुपैयाँ बराबरको कर्जा तथा सापटी गरेका छन् । जुन अघिल्लो वर्षको सोही अवधिमा २ खर्ब ६२ अर्ब ७२ करोड रुपैयाँ थियो ।
यससँगै समीक्षा अवधिमा लघुवित्तको कर्जा र निक्षेप तथा सापटी अनुपात १०५.८० प्रतिशतबाट बढेर १०८.२७ प्रतिशत पुगेको छ । त्यसैगरी, लघुवित्तको निष्कृय कर्जा अघिल्लो वर्षको तुलनामा ८७.८३ प्रतिशतले बढेको छ । अर्थात २०७८ असार मसान्तमा लघुवित्तको निष्कृय कर्जा मात्रै ९ अर्ब ९५ करोड रुपैयाँ पुगेको छ ।
त्यस्तै, अघिल्लो आर्थिक वर्षको तुलनामा संस्थाको जोखिम भारित सम्पत्तिमा ३८.३१ प्रतिशत र लगानीमा ६१.३६ प्रतिशतले वृद्धि भएको देखिन्छ । बैंकले सार्वजनिक गरेको लघुवित्त वित्तीय संस्थाहरुको निरीक्षण तथा सुपरिवेक्षण सम्बन्धी वार्षिक प्रतिवेदन अनुसार सो मात्राको वृद्धि देखिएको हो ।
बैंकको उक्त प्रतिवेदन अनुसार अघिल्लो आर्थिक वर्षको तुलनामा ब्याज खर्चमा १५.६४ प्रतिशतले कमी आएको र ब्याज आम्दानीमा ११.०५ प्रतिशतले वृद्धि भएको छ । त्यस्तै, सञ्चालन आम्दानीमा ७७.४१ प्रतिशतले वृद्धि भई खुद नाफामा पनि १४६.७१ प्रतिशतले वृद्धि भएको तथ्यांकले देखाउँछ ।
ऋणी संख्या २९ लाख ९२ हजार नाघ्यो
२०७७ असार मसान्तमा ८४ वटा लघुवित्त वित्तीय संस्थाहरु रहेकोमा आर्थिक वर्ष २०७७/७८ मा १५ संस्था मर्ज वा प्राप्तिमा गएको र थप एक संस्थाले वित्तीय कारोवार गर्ने स्वीकृति पाएकोले२०७८ असार मसान्तमा ७० लघुवित्त वित्तीय संस्थाहरु सञ्चालनमा रहेका छन् ।
जसमध्ये राष्ट्रियस्तरका ४७, प्रदेशस्तरका १५, १९ जिल्ला कार्यक्षेत्र भएको १, ४–१० जिल्ला कार्यक्षेत्र भएको ६ र १–३ जिल्ला कार्यक्षेत्र भएका १ संस्था, २ संस्था सर्वसाधारणहरुबाट निक्षेप स्वीकार गर्ने र ६८ संस्था सर्वसाधारणहरुबाट निक्षेप स्वीकार नगर्ने, ४ संस्था थोक कर्जा कारोवार गर्ने र ६६ संस्था खुद्रा कारोबार गर्ने संस्थाहरु रहेका छन ।
२०७८ असार मसान्तसम्ममा ७० लघुवित्त वित्तीय संस्थाले ४,६२१ शाखा कार्यालय मार्फत लघुवित्त सेवा प्रदान गर्दै आएका छन् भने लघुवित्त संस्थाहरुको केन्द्र संख्या ३ लाख ६२ हजार ९ सय ८२, समूह संख्या ११ लाख ८३ हजार ३ सय ६४, सदस्य संख्या ५१ लाख ९१ हजार ३ सय ६३ तथा ऋणी संख्या २९ लाख ९२ हजार ६८ रहेका छन्। लघुवित्त वित्तीय संस्थाको उपस्थिति ७७ जिल्लामा रहेको छ ।
त्यसैगरी २०७८ असार मसान्तमा लघुवित्त संस्थाहरुमा २० हजार ८ सय ७२ जना कर्मचारीहरु कार्यरत रहेको देखिन्छ भने लघुवित्त वित्तीय संस्थाहरुको प्रति शाखाले औसतमा १,१२३ सदस्यहरुलाई सेवा दिइरहेको छ ।
