काठमाडौं । सामाजिक सञ्जाल ट्विटरले भारत सरकार विरुद्ध मुद्दा हालेको छ । ट्विटरलाई भारतबाट विभिन्न सामग्री हटाउन तथा पोस्टहरु ब्लक गर्न आदेश दिएसँगै मुद्दा हालेको हो ।
ट्विटरको मुद्दा, बैंगलोरको कर्नाटक उच्च अदालतमा दायर गरिएको छ । भारत सरकारको हालैको आदेशलाई कम्पनीले सामग्री हटाउन र दर्जनौं खाताहरू ब्लक गर्ने आदेशलाई चुनौती दिद्र मुद्दा हालेको हो । ट्विटरको मुद्दा समीक्षा गर्न न्यायाधीशको लागि मिति तय गरिएको छैन।
ट्वीटरलाई भारत भित्रबाट दर्जनौं खाता र पोस्टहरू ब्लक गर्न सोमबारसम्मको म्याद दिएको थियो । यदि तिनीहरूले पालन गर्न असफल भएमा ट्विटरका अधिकारीहरू विरुद्ध आपराधिक कारबाही गर्ने धम्की समेत दिइएको थियो ।
ट्विटरलाई नागरिक स्वतन्त्रता, विरोध प्रदर्शन र महामारीमा सरकारको प्रतिक्रियाको बारेमा उजुरीसँग सम्बन्धित सामग्री हटाउन भनिएको हो । ट्वीटरले आफुलाई दिइएको सोमबारसम्मको म्यादमा त्यस्ता पोष्ट हटाएपनि म्याद सकिनेवित्तिकै न्यायीक राहत खोजेको हो ।
गत हप्ता, अमेरिकी गैर-नाफामुखी संस्था फ्रिडम हाउसबाट ट्वीटहरू रोक्न आदेश दिइएको थियो जसले भारतलाई प्रेस स्वतन्त्रता घटिरहेको देशको उदाहरणको रूपमा उल्लेख गरेको थियो।
यसैबीच भारत सरकारले मंगलबार ट्विटरलाई नियमहरू पालना गर्न आग्रह गरेको छ। ‘देशको संसदले पारित गरेको कानूनको पालना गर्नु सबैको दायित्व हो,’ विद्युतीय तथा सूचना प्रविधिमन्त्री अश्विनी वैष्णवले पत्रकार सम्मेलनमा भने ।
बजार अनुसन्धान फर्म इनसाइडर इन्टेलिजेन्सले २०२१ को अनुमान अनुसार भारत ट्विटरका सबैभन्दा बढी प्रयोगकर्ता हुनेमध्य चौथो बजार हो । ट्वीटरको हाल ३८ मिलियन भन्दा बढी प्रयोगकर्ताहरू छन् । यो प्रकरणले विपक्षीसँग तनाव बढ्ने तथा प्रयोगकर्ता घट्नसक्ने सम्भावना छ ।
विभिन्न कम्पनीहरूले तर्क गरेका छन् कि भारतका नियमहरूले सरकारलाई आफ्ना आलोचकहरूलाई व्यापक रूपमा सेन्सर गर्न अनुमति दिन्छ, र तिनीहरूले एन्क्रिप्शन जस्ता सुरक्षा उपायहरू मेटाउँछन्। तर भारतीय अधिकारीहरूले अनलाइन गलत सूचनाहरू विरुद्ध लड्न कानून आवश्यक भएको बताएका छन्।
