काठमाडौं, २ साउन । इण्डियन आयल कर्पोरेशन (आईओसी) ले नेपाल पठाउने पेट्रोलियम पदार्थको मूल्य घटेर आएको छ ।
नेपाल आयल निगम (एनओसी) ले दिएको जानकारी अनुसार शनिवार पेट्रोलियम पदार्थको नयाँ मूल्यसूची पठाएको हो ।
नयाँ मूल्यसूचीमा पेट्रोल प्रतिलिटर १५ रुपैयाँ ७६ पैसा र डिजल प्रतिलिटर १६ रुपैयाँ ५६ पैसा घटेर आएको छ ।
आईओसीले अहिले घटाएर पठाए पनि यसअघिको नोक्सानीको असर परिरहेकाले सोनुरुप नेपालमा तत्काल तेलको मूल्य नघट्ने निगम स्रोतले जनाएको छ ।
नोक्सानी बढेकै कारण आयल निगमले हाल आईओसीलाई ३१ अर्ब २० करोड रुपैयाँ तिर्न बाँकी छ । सो ऋण रकम तिर्न निगमले वाणिज्य बैंक र सरकारबाट करिब १० अर्ब ऋण लिँदैछ ।
अन्तर्राष्ट्रिय बजारमा इन्धनको मूल्य घट्न थालेको छ । अन्तर्राष्ट्रिय बजारमा इन्धनको मूल्य घटेपछि भारतीय आयल कर्पोरेशनले पनि शनिवारबाट नेपाललाई मूल्य घटाएर विक्री सुरु गरिसकेको छ । तर नेपाल आयल निगमले भने मूल्य समायोजनतर्फ चासै दिएको छैन ।
असार ३२ गते शनिवारबाट नेपाल आयल निगमले भारतीय आयल कर्पोरेशनसंग पेट्रोल प्रतिलिटर एक सय १७ रुपैंयाा ४२ पैसामा र डिजल एक सय ३७ रुपैंयाा ३६ पैसामा खरिद गरिरहेको छ ।
पेट्रोलमा १५ र डिजलमा १६ रुपैंयाामा मूल्य घटेर आएपनि मूल्य समायोजन नगरिदा उपभोक्ता मारमा परेका छन् । घटेर आएको मूल्य अनुसार निगमलाई मासिक रुपमा ४ अर्ब ३२ करोड र पाक्षिक २ अर्ब १६ करोड रुपैयाँ घाटा रहेको जनाएको छ ।
