काठमाडौं । नेपाली राष्ट्रिय क्रिकेट टोलीको मुख्य प्रशिक्षकबाट राजीनामा दिएका पुबुदु दशानायके क्यानडाको मुख्य प्रशिक्षक नियुक्त भएका छन्।
क्रिकेट क्यानडाले सामाजिक सञ्जालमार्फत पुबुदुलाई मुख्य प्रशिक्षक नियुक्त गरेको जानकारी दिएको छ।
नेपालको मुख्य प्रशिक्षकबाट राजीनामा दिएको केही घण्टामै उनलाई क्रिकेट क्यानडाले राष्ट्रिय क्रिकेट टीमको मुख्य प्रशिक्षक नियुक्त गरेको जानकारी गराएको हो।
पुबुदुले बुधबार पत्रकार सम्मेलन गर्दै व्यक्तिगत कारण देखाएर नेपाली क्रिकेट टीमको मुख्य प्रशिक्षकबाट राजीनामा दिएका थिए।
उनी खेलाडी र नेपाल क्रिकेट संघ (क्यान) बीच विवाद भइरहँदा गत वर्ष मंसिरमा नेपालको मुख्य प्रशिक्षक नियुक्त भएका थिए।
तर आईसीसी विश्वकप क्रिकेट लिग–२ अन्तर्गत स्टकल्याण्डमा सम्पन्न त्रिकोणात्म श्रृंखला नेपालले अपेक्षाअनुसारको प्रदर्शन गर्न सकेको थिए। नेपालले सिरिजका चारमध्ये तीन खेल गुमाएको थियो।
उनी यसअघि सन् २०११ देखि २०१५ सम्म पनि नेपाली राष्ट्रिय क्रिकेट टीमको प्रशिक्षक थिए। नेपालले सन् २०१४ मा बंगलादेशमा भएको टी–२० विश्वकप क्रिकेट खेल्दा पुबुदु नै प्रशिक्षक थिए।
