काठमाडौं, २३ साउन । पछिल्लो समय वाणिज्य बैंकहरुमा निक्षेप घट्ने क्रम जारी रहेको छ ।
असार मसान्तदेखि यता बैंकहरुको निक्षेप ९५ अर्ब रुपैयाँले घटेको छ । कर्जा लगानी ९ अर्बले घटेको छ ।
नेपाल बैंकर्स संघले उपलब्ध गराएको तथ्यांक अनुसार पछिल्लो एक सातामा बैंकहरूमा ४ अर्ब रुपैयाँ निक्षेप घट्दा कर्जा लगानी भने २ अर्ब रुपैयाँले बढेको हो ।
असार मसान्तसम्ममा वाणिज्य बैंकहरूमा ४५ खर्ब ४१ अर्ब रुपैयाँ निक्षेप रहेकोमा साउन मसान्तमा भने सो रकम घटेर हाल ४४ खर्ब ४६ अर्ब रुपैयाँ कायम भएको छ ।
नेपाल आयल निगमले आइओसीलाई तिर्न बैंकमा राखेको पैसा झिक्दा र निर्माण व्यवसायीहरुले राखेको रकम फिर्ता लैजाँदा बैंकबाट ठूलो मात्रमा निक्षेप घटेको बताइएको छ ।
त्यस्तै, पछिल्लो एक सातामा बैंकहरूले कर्जा लगानी २ अर्ब रुपैयाँले बढाएको देखिन्छ । साउन १३ गते ४१ खर्ब ६४ अर्ब रुपैयाँ कर्जा प्रवाह गरेको बैंकहरूले साउन २० गतेसम्म सो रकम बढाएर ४१ खर्ब ६६ अर्ब रुपैयाँ पुर्याएको हो ।
यो रकम असार मसान्तको तुलनामा भने ९ अर्ब रुपैयाँले कम हो ।
असार मसान्तसम्ममा बैंकहरूले ४१ खर्ब ७५ अर्ब रुपैयाँ कर्जा लगानी गरेका थिए । साउन २० गतेसम्म बैंकहरूको निक्षेप–कर्जा अनुपात (सिडी रेसियो) ८७.६९ प्रतिशत रहेको छ ।
