पोखरा । ‘पोखरा घर’ बनाउने योजनाका साथ पोखरा महानगरपालिकाले पृथ्वी चोकमा रहेको पुरानो ट्राफिक कार्यालयको भवनमा डोजर चलाएको छ ।
महानगरको कार्यपालिकाको बैठकको निर्णयअनुसार पृथ्वी चोकको पुरानो ट्राफिक कार्यालयको भवनमा मंगलवार डोजर चलाएको हो । त्यसका लागि महानगरले २ करोड रुपैयाँ विनियोजन गरिसकेको छ । त्यहाँवटा २ वर्ष अघिमात्र ट्राफिक कार्यालय नयाँ भवनमा सरेको थियो ।
उक्त जग्गा उपत्यका नगर विकास समितिको स्वामित्वमा छ । तत्कालीन समयमा समितिले त्यहाँ बसपार्कका लागि टिकट घर बनाउने भन्दै जग्गा अधिग्रहण गरेको थियो ।
जग्गा समितिले निशुल्क रूपमा बस टर्मिनलका रूपमा ०३२ सालमा लिएको थियो। अब पृथ्वीचोकको करिब २ रोपनी जग्गामा पोखरा घर बन्नेछ। ‘पोखरा घर’को भुइँतलामा सूचना केन्द्र, दोस्रो तलामा पुस्तकालय, तेस्रो तलामा ग्यालरी र त्यसमाथि घण्टाघर बनाउने महानगरको योजना रहेको छ ।
