काठमाडौं, २३ साउन । केही समय अघिसम्म गाउँघरमा बुढापाका मानिसहरुले सोखको रुपमा हुक्का तान्ने गर्थे ।
कोइला माथि तमाखु राखेर तान्ने हुक्का त आजभोली लोप हुने बेला भइसक्यो । तर, आजभोलि सहरमा नयाँ यूवा पुस्ताले नयाँ अन्दाजमा हुक्का तान्न थालेका छन् ।
आजभोली शहरका कुना कुनामा खुलेका रेष्टुरेन्ट र क्लबहरुमा हुक्का तान्न आउने युवायुवती धेरै हुने गरेका छन् ।
त्यसैले होला काठमाडौं सहरमा अधिकांश रेष्टुरेन्टहरुले ‘यहाँ हुक्का पाईन्छ’ भन्ने बोर्ड झुण्ड्याउन थालेका छन् ।
युवायुवतीका लागि हुक्का तान्नु फेसन नै बनेको छ । उनीहरु यसले गर्ने हानीतर्फ सचेत छैनन् ।
युवायुवतीहरुले यस्तोसँग हुक्का तान्ने गर्छन् की त्यो देख्दा लाग्छ यसले कुनै प्रकारको हानी नै गर्दैन् । तर, यो पनि त एक नसा नै हो जसले धेरै हानी गर्छ ।
संसारमा यस्तो कुनै प्रकारका नसालु पदार्थ हालसम्म बनेको छैन् जसले हाम्रो शरीरमा नकारात्मक असर नगरोस् । त्यसकारण हुक्काको पनि धेरै नराम्रा पक्षहरु छन् जसले हाम्रो शरीरलाई नकारात्मक प्रभाव पार्ने गर्छ ।
थाहा पाइराखौं हुक्काको बेफाइदाको बारेमाः
— चुरोट भन्दा खतरनाक हुन्छ हुक्का
यूनिभर्सीटी अफ कोलम्बीयाको एक रिपोर्ट अनुसार हुक्का चुरोट भन्दा धेरै हानीकारक हुन्छ । यसमा निकोटीनको साथै ह्यासीस (एक प्रकारको लागुऔषध) को प्रयोग भएको हुन्छ ।
यसका साथै हुक्कामा प्रयोग गरिने फ्लेबरहरुमा पनि शरीरलाई हानी गर्ने पदार्थहरुको प्रयोग गरिएको हुन्छ ।
केही मानिसहरुमा हर्बल हुक्काले धेरै हानी गर्दैन् भन्ने धारणा रहेको हुन्छ । तर, यो गलत हो । हर्बल हुक्काले पनि त्यति नै असर गर्दछ जति अन्य हुक्काले गर्छ ।
— चुरोट भन्दा हुक्कामा प्रयोग हुने सुर्ती खतरनाक हुन्छ
हुक्का पिउनु यसकारण पनि खतरनाक हुने गर्दछ कि जो मानिसहरु हुक्का सेवन गर्छन उनीहरु ३० देखि ४५ मिनेटसम्म तान्ने गर्छन् ।
यती धेरै समयसम्म लगातार हाम्रो शरीरमा कार्बनमोनोअक्साइड जाने गर्दछ । मानव शरीरको लागि कार्बनमनो अक्साइड धेरै हानीकारक मानिन्छ ।
— मुटुमा समस्या पैदा गर्छ
फ्लेबरयुक्त हुक्काको सेवन गर्दा त्यसमा भएको सुर्तीको कारण लेड र मानव शरीरको लागि खतरनाक अन्य रसायन पैदा हुने हुन्छ, जुन मुटुको लागि खतरनाक हुन्छ ।
हुक्का सेवन गर्ने मानिसहरुमा श्वासप्रश्वास रोकिने सम्भावना पनि धेरै हुन्छ । लगातार लामो समयसम्म हुक्का सेवन गर्दा मुटुका धमनीहरुमा समस्या हुने र त्यसकारण हर्ट अट्याक, स्ट्रोक्स र अन्य कार्डियो भास्कुलर रोगहरुको जोखिम हुन्छ ।
— क्यान्सरको सम्भावना
जो मानिसहरु हुक्का तान्दा पानीको बाटो हुँदै आउने धँुवाले खासै असर गर्दैन् भन्ने मान्यता राख्छन् उनीहरु गलत छन् ।
हुक्काको सेवनको कारण मुख, फोक्सो तथा रक्त क्यान्सर हुने सम्भावना निकै उच्च हुन्छ ।
यसका साथै हृदयघात तथा धमनीहरुमा बेकार पदार्थहरु जमाउने काम पनि हुक्काले गर्छ ।
