काठमाडौं । ६० प्रतिशत पनि निर्माण नसकिँदै २०७८ वैशाख ११ गते हतार-हतार तत्कालीन प्रधानमन्त्री केपी शर्मा ओलीले उद्घाटन गरेका धरहराको २० प्रतिशत काम सकिन बाँकी छ ।
२०७७ सालमा सक्ने गरी सम्झौता गरिए पनि निर्माण अझै सकिएको छैन । पाँचौं पटक समय थप्ने तयारी भइरहेको छ ।
दुई वर्ष बितिसक्दा पनि न त सर्वसाधारणले धरहरा चढ्न पाएका छन्, न निर्माणले नै पूर्णता पाएको छ । २०७२ फागुन ४ गते तत्कालीन प्रधानमन्त्री ओलीले धरहरा पुनःनिर्माणका लागि ‘मेरो धरहरा मै बनाउँछु’ अभियान चलाएका थिए ।
यसअनुसार विभिन्न संघसंस्था र व्यक्तिबाट संकलित रकममा सरकारले थपेर तीन अर्ब आठ करोड लागतमा धरहरा बनाइएको हो । यस परियोजनामा ४२ रोपनी क्षेत्रफलको सुन्धारासहितको सम्पूर्ण क्षेत्रलाई आधुनिक रुपमा दिइएको छ ।
