काठमाडौं । यस वर्षको बालोन डी’ओर अवार्डका लागि खेलाडीहरुको सर्ट लिस्ट सार्वजनिक गरिएको छ । आयोजक फ्रान्स फुटबल म्यागजिन मनोनयनमा परेका पुरुष तथा महिला खेलाडीहरुको नाम सार्वजनिक गरेको हो।
उक्त सूचीमा स्टार खेलाडीहरु समावेश हुँदा क्रिस्टियानो रोनाल्डो भने अटाएनन् । युरोपियन लिग खेल्ने खेलाडीहरुको बाहुल्य रहेको सूचीमा अमेरिकन क्लब गएका अर्जेन्टिनाका विश्वकप विजेता लिओनल मेस्सी मुख्य दाबेदारको रुपमा छन् ।
मेस्सीले अर्जेन्टिनालाई सन् १९८६ पछि पहिलो पटक गत डिसेम्बरमा कतारमा सम्पन्न विश्वकपको उपाधि जिताएका थिए। पाँच पटक अवार्ड विजेता पोर्चुगिज स्टार क्रिस्टियानो रोनाल्डो २० वर्षपछि पहिलो पटक मनोनयनमा पर्न सकेनन्।
रोनाल्डोको बालोन डी’ओर सर्टलिस्टमा नाम नपरेको सन् २००३ पछि यो पहिलो पटक हो। यूइएफए वर्ष खेलाडी विजेता म्यानचेस्टर सिटीका स्ट्राइकर एर्लिङ हालान्ड र पेरिस सेन्ट जर्मेन (पीएसजी) का फरवार्ड केलियन एमबाप्पे पनि सर्ट लिस्टमा परेका छन्।
ट्रेबल विजेता म्यानचेस्टर सिटीबाट कीर्तिमानी गोलकर्ता हालान्डसहित केभिन डे ब्रुइन, रुबेन डायस, विश्वकप विजेता जुलियन अल्भारेज, बर्नार्डो सिल्भा, रोड्री र जोस्को ग्वार्डियोल मनोनयनमा परेका छन्। यो वर्षको बालोन डी’ओर अवार्ड अक्टोबर ३० मा प्रदान गरिने छ ।
