काठमाडौं । काठमाडौं–तराई/मधेस द्रुतमार्ग निर्माणको काम २६ प्रतिशत सकिएको छ ।
आइतबार नेपाली सेनाले पत्रकार सम्मेलनमार्फत काठमाडौं–तराई/मधेस द्रूतमार्ग सडक आयोजना निर्माणको कामको आर्थिक वर्ष २०७९/८० को श्रावण मसान्त सम्मको भौतिक प्रगति २६.१४ प्रतिशत भएको जानकारी गराइएको हो ।
आयोजनाको हालसम्म करिब एकचौथाई काम सकिएको छ । आर्थिक वर्ष २०७४/७५ देखि निर्माण सुरु गरिएको यस आयोजना २०८१ भित्र निर्माण सम्पन्न गर्नुपर्ने भए पनि तोकिएकै सममा काम सम्पन्न नहुने भएपछि हालै म्याद थपिएको छ । थपिएको म्याद अनुसार अब २०८३ सम्म सम्पन्न गर्नुपर्नेछ ।
पुरानो डीपीआर अनुसार फास्ट ट्रयाकको कुल लम्बाइ ७२.७२९ किलोमिटर रहेकोमा हालै डीपीआर संशोधन गरी ७०.९७७ किलोमिटरमा झारिएको छ ।
आयोजनाको संशोधित अनुमानित लागत २ खर्ब ११ अर्ब ९३ करोड ररुपैयाँ रहेको छ । चालु आर्थिक वर्षमा यस आयोजनालाई २२ अर्ब ५० करोड रुपैयाँ बजेट विनियोजन गरिएको छ ।
त्यस्तै द्रूतमार्गको सिस्नेरी तथा मख्खुबेंसी खण्ड अन्तर्गत पर्ने प्याकेज नम्बर ८ क, ९ क र ९ खको द्रूतमार्गको मख्खुबेंसी तथा सिस्नेरी खण्डको प्याकेज नम्बर ८क, ९ क र ९ खको २०८० साल भाद्र १३ गते बोलपत्र खोलुवा भई मूल्यांकन भइरहेको जनाइएको छ ।
त्यसैगरी द्रूतमार्गको मख्खुबेंसी तथा महादेवटार खण्डमा पर्ने प्याकेज नम्बर ८ ख र १० को २०८० साल भाद्र १ गते बोलपत्र आव्हान भएको छ । प्रमुख शाहका अनुसार आयोजनाको करिब ९५ प्रतिशत प्याकेजहरू कार्यान्वयन तथा खरिद प्रक्रियामा प्रवेश गरिसकेको छ ।
आयोजना अन्तर्गत हाल निर्माण भइरहेका तीन वटै सुरुङ निर्माणले गति लिएको हो ।
काठमाडौं-तराई/मधेश द्रुतमार्ग आयोजना प्रमुख कमलबिक्रम शाहले हालसम्म समग्रमा ४१ प्रतिशत सुरुङ खन्ने काम सम्पन्न भएको जानकारी दिए । उनका अनुसार कुल ६.४१५ किलोमिटर लामो सुरुङमध्ये हालसम्म २.६६७ किलोमिटर सुरुङ खन्ने काम सम्पन्न भएको छ ।
महादेवटारमा ३.३५५ किलोमिटर लामो सुरुङ खन्नुपर्नेमा हालसम्म १.३८ किलोमिटर सुरुङ खनिसकएिको उनले जानकारी दिए । त्यसैगरी, १.६३ किमी लामो धेद्रे सुरुङको हालसम्म ६१९ मिटर र १.४३ किलोमिटर लामो लेनडाँडा सुरुङमध्ये ६६१ मिटर सुरुङ खन्ने काम पूरा भएको उनले बताए ।
फाष्ट ट्रयाक आयोजना अन्तर्गत हाल ३ वटा सुरुङ निर्माण भइरहेकोमा डीपीआर संशोधन गरेर थप ३ वटा नयाँ सुरुङ निर्माण गरिने भएको छ । आयोजना प्रमुख शाहका अनुसार देवीचौर, सिसौटार र चन्द्राम भीरमा सुरुङमार्ग बनाइने भएको हो ।
उनका अनुसार देवीचौरमा १ किलोमिटर, सिसौटार सुरुङ ०.३९ किलोमिटर र चन्द्राम भीरमा २.२५ किलोमिटर सुरुङ निर्माण गरिने छ ।
३ वटा नयाँ सुरुङ थपिएसँगै फास्ट्रयाकमा कुल सुरुङमार्गको लम्बाइ १०.०५५ किलोमिटर पुग्नेछ । थप तीन वटा नयाँ सुरुङ निर्माणको लागि समेत ठेक्का आह्वान भइसकेको उनले बताए ।
