काठमाडौं । काठमाडौं महानगरपालिकाले महानगरभित्र ३६ ठाउँमा स्विच थिचेर बाटो काट्न मिल्ने पेलिकन क्रसिङ प्रणाली जडान गर्ने भएको छ । विद्यालय,अस्पताल आसपास लगायतका ठाँउमा सडक विभागसँग सहकार्य गरेर यो प्रणाली जडान गर्न लागिएको महानगरले जनाएको छ ।
थप प्रविधि जडान गर्नका लागि यो साताभित्र टेन्डर खुलाउने प्रक्रियामा रहेका जनाइएको छ । हाल बबरमहलमा राखिएको यही प्रणालीलाई सोमबार सञ्चालनमा ल्याइएको थियो ।
बटन थिचेपछि ५ सेकेण्डमा हरियो बत्ती बल्ने र तोकिएको ३० सेकेण्डभित्र पैदलयात्रुले जेब्रा क्रसिङ गरिसक्नुपर्नेछ । एकपटक थिचिसकेपछि २ मिनेट भने बत्ती बल्ने छैन ।
