काठमाडौं । भिजिट भिसामा यूएई जान लागेको अवस्थामा ३ जना महिला विमानस्थलबाट फर्काइएका छन् ।
त्रिभुवन अन्तर्राष्ट्रिय विमानस्थलबाट बिहीबार राति साढे १० बजे हिमालय एयरलाइन्सबाट दूबई जान लागेका उनीहरुलाई फर्काइएको हो । सोधपुछपछि शंकास्पद देखिएकाले तेह्रथुम, अर्घाखाँची र चितवन महिलालाई फिर्ता पठाइएको प्रहरीले जनाएको छ ।
एजेन्ट भविलाल थापालाई प्रहरीले हिरासतमा राखेर सोधपुछ सुरु गरेको छ । । एजेन्टको मोबाइलबाट विगतमा पनि उनले पैसा उठाएर भिजिट भिसामा पठाउने गरेको प्रमाणहरू भेटिएको प्रहरीले जनाएको छ ।
केही समय अघि भिजिट भिसामा नेपालीलाई पैसा उठाएर विदेश पठाउने गरेको अभियोगमा अध्यागमनका नौ अधिकृतसहितलाई प्रहरीले मुद्दा चलाएको थियो । पक्राउ परेका थापालाई थप अनुसन्धानका लागि उपत्यका अपराध अनुसन्धान कार्यालय पठाइएको छ ।
रसियन सेनामा जाने कतिपय नेपालीलाई पनि एजेन्टले भिजिट भिसामा दुबई लगेर त्यहाँबाट मस्को पठाएको अनुसन्धानबाट देखिएको थियो । घरेलु कामदारको रुपमा काममा लगाउन प्रतिव्यक्ति २ लाख रुपैयाँ लिएर एजेन्टले दुबई पठाउन लागेका थिए ।
