काठमाडौं । राष्ट्रिय स्वतन्त्र पार्टीका सांसद स्वर्णिम वाग्लेले सदनमा कांग्रेसले गरिरहेको नाराबाजी औचित्यहीन भएको बताएका छन् ।
कांग्रेस सांसदले नाराबाजीका बीच जारी सरकारको नीति तथा कार्यक्रममाथि छलफलमा भाग लिँदै उनले कांग्रेसलाई बीपी कोइरालाले स्थापना गरेको मानक पढाउँदै उनले भने, “६५ वर्षअघि नेपाली लोकतान्त्रिक आन्दोलनको धरोहर, हामी सबैको प्रेरणा, मेरो राजनीतिक आदर्श बीपी कोइरालाले ६५ वर्षअघि स्थापित गर्नुभएको मानकलाई आज यो अवस्थामा पुर्याउनलाई यो लज्जास्पद, औचित्यहीन विरोधप्रति मेरो घोर खेद छ । संसद्को ओझ, संसद्को गरिमा, संसद्को उपदेयता असान्दर्भिक बनाउने कदम असान्दर्भिक छ ।”
उनले सहकारीका समस्या समाधान गर्ने कि व्यक्ति तोकेर खराब नजिर बनाउने भन्दै भने, “समाधान गर्ने कि ७४ लाख बचतकर्ताको सहकारीमा बचत राखिएको छ, समाधानउन्मुख हुने कि व्यक्तिकेन्द्रित भएर खराब नजिर बनाउने ?”
उनले सो अभिव्यक्ति दिइरहँदा कांग्रेस सांसदहरूले नाराबाजी गरिरहेका थिए । केही सांसदले चर्को आवाजमा होहल्ला समेत गरे ।
सभामुख देवराज घिमिरेले समेत विषयवस्तुमा आफ्ना कुरा राख्न उनको ध्यानाकर्षण गराएका थिए ।
