यसै सिजनमात्रै रियल मड्रिड छाडेर इटालीको सिरिए क्लब युभेन्टस पुगेका स्टार फुटबलर क्रिष्टियानो रोनाल्डोले बेलायतको म्यानचेष्टर शहरमा रहेको आफ्नो घर बिक्री गर्ने भएका छन् ।
म्यानयु छाडेको एक दशकपछि रोनाल्डोले म्यानचेष्टर शहर नजिकै एडर्ली एज भिलेजमा रहेको आफ्नो भव्य बंगला बिक्री गर्न लागेका हुन् ।
युनाइटेडको रंगशाला ओल्ड ट्रफोर्डबाट १५ माइलमात्रै टाढा रहेको पाँच बेडरुम सहितको तीनतले उक्त घरको मूल्य उनले ३२ लाख ५० हजार पाउण्ड अर्थात करीब ४८ करोड नेपाली रुपैयाँ राखेका छन् । तर, आफूले राखैकै मूल्यमा घर बेच्दा पनि यी पोर्चुगिज स्टारले ६ लाख पाउण्ड भन्दा धेरै घाटा बेहोर्नुपर्ने छ । ३३ वर्षीय रोनाल्डोले सन् २००७ मा उक्त घर करीब ३९ लाख पाउण्डमा किनेका थिए ।
इन्टरनेटमा सार्वजनिक भएका उक्त बंगलाको तस्वीरहरुले फर्निचर र सजावटमा रोनाल्डोको गोथिक शैलीको मोह झल्काउँछ । घरको बाँया हिस्साको सजावट अधिकांश कालो रंगको रहेको छ ।
बंगला विलासी सुविधाहरुले भरिपूर्ण रहेको छ । बंगलामा स्विमिङ पुल, ठूलो र अत्याधुनिक भान्छाकोठा, स्टिम रुम, थिएटर रुम र जिम लगायतका सुविधा रहेका छन् । रोनाल्डोले उक्त बंगला सन् २०१३ मा पनि बेच्न खोजेका थिए । त्यतिखेर उनले बंगलाको मुल्य ३७ लाख पाउण्ड राखेका थिए ।
सन् २००८ मा म्यानचेस्टर युनाइटेड छाडेका रोनाल्डोले बंगला बिक्री गर्न लागेको बारेमा कुनै प्रतिक्रिया दिन चाहेका छैनन् ।
(एजेन्सीको सहयोगमा)
