काठमाडौं, २५ मंसिर । नेपाल स्टक एक्सचेन्ज (नेप्से) ले सूचीकृत कम्पनीहरुको पहिलो त्रैमासमा गरिएको वर्गीकरण संशोधन गरेको छ ।
नेप्सेले सार्वजनिक गरेको चालु आर्थिक वर्षको पहिलो त्रैमासको सूचीकृत कम्पनीहरुको वर्गीकरणमा ९ वटा वाणिज्य बैंक र एउटा विकास बैंक ‘ए’ वर्गमा परेका छन् ।
नेप्सेले धितोपत्र सूचीकरण विनियमावली, २०७५, को विनियम ११ बमोजिम कम्पनीहरुको वर्गिकरण सूची सार्वजनिक गर्दै आएको छ। नेपाल धितोपत्र बोर्डले लागू गरेको नयाँ नियमावलीमा अनुसार कम्पनीहरुलाई ए, बी, जी र जेड गरी चार वर्गमा वर्गिकरण गरेको हो ।
नेप्सेले कम्पनीको चुक्ता पूँजी, धितोपत्र सूचीकरणको अवधि, लाभांश वितरण, क्रेडिट रेटिङ्ग, नियम परिपालना, लगायतको आधारमा कम्पनीहरुको वर्गिकरण सार्वजनिक गर्नेछ ।
नेप्सेले गत कात्तिक ७ गते सार्वजनिक गरेको सूचीमा उक्त समुहमा पर्न नपर्नुको कारण सहित ३५ दिन भित्र उक्त बर्गिकरणको समुहमा पर्नुपर्ने दाबी सहित आवेदन माग गरेको थियो। कम्पनीहरुले प्रमाणसहित पठाएको अन्तिम दाबीका आधारमा अध्ययन गरी नयाँ वर्गिकरण सूची सार्वजनिक गरिएको नेप्सेले जनाएको छ।
परिमार्जित सूची अनुसार सिटिजन्स इन्टरनेसनल बैंक, ग्लोबल आइएमई बैंक, माछापुच्छ्रे बैंक, नेपाल इन्भेस्टमेन्ट बैंक, एनएमबी बैंक, नेपाल एसबीआई बैंक, एनआईसी एसिया र स्टाण्डर्ड चार्टड्स बैंक क्लास ‘ए’ कम्पनीका रुपमा सूचीकृत भएका छन्। त्यस्तै मुक्तिनाथ विकास बैंक यो श्रेणीमा पर्ने एउटा मात्र विकास बैंक हो।
‘क्लास बी’ कम्पनीमा ङादी पावर कम्पनी लिमिटेड मात्र सूचीकृत छ। त्यस्तै ‘क्साल जी’मा ३५ वटा कम्पनी सूचीकृत भएका छन्। सार्वजनिक वर्गिकरण अनुसार अधिकांश कम्पनी खराब कम्पनीको समूहमा परेका छन् । सबैभन्दा काम नलाग्ने कम्पनीको समूह मानिएको ‘जेड’ समूहमा १ सय ६५ कम्पनी परेका छन् ।
१ सय ६५ कम्पनी खराब कम्पनीको सूचीमा
पहिलो त्रैमासिक वर्गीकरण सूची अनुसार कूल २ सय १२ कम्पनीमध्ये १ सय ६५ कम्पनी खराब कम्पनीको सूचीमा परेका छन् । कम्पनीको रेटिङको वैधानिकता सकिएको र कतिपय कम्पनीले समयमै साधारणसभा नगरेकाले खराब समूहको सूचीमा परेका हुन् ।
बजारमा राम्रा कम्पनी मानिएका र उच्च सेयर मूल्य भएका कम्पनीहरू समेत खराब कम्पनीको सूचीमा परेका छन् ।
